زوراکی نا بیگواہی تا برخلاف کاریم کروک تنظیم وائس فار بلوچ مسنگ پرسنز تینا شنگ کروک بیان ئٹ پارینے کہ غلام رسول شاہوانی برانزی کیمپ آ برسا تینا مار ساجد شاہوانی نا کوائف تہ تنظیم تون جمع کرینے۔
او پاریر کہ اوفتا مار اسہ خوانندہ ئس ءِ و ہچو بے قانودی کاریم تیٹ اونا دو اف، 20 اگست 2024 آ سی ٹی ڈی و پاکستانی لشکر نا کارندہ غاک کلی گوگڑائی کیچی بیگ سریاب کوئٹہ ٹی ننا اوفتا اراغا بسر و بے قانودی اودے دزگیر کننگ آن گڈ بیگواہ کریر و اوفتا مار ئنا بارو ئٹ اوفتہ ہچ وڑ ئنا معلومداری ہم تننگ افس ہرا نا سوب آن خاہوت سخت ڈکھ و فریشانی ٹی زند کننگ ءِ۔
بیان ئٹ ودیک پاننگا کہ تنظیمی تیبر آ غلام رسول شاہوانی ئے باور تننگا کہ اونا مار ساجد شاہوانی نا کیس ئے صوبائی حکومت و بیگواہ غا بندغ آتیکن جوڑ کننگوک کمیشن ئے تننگ مرو و اونا رکھوک آجوئی کن ہر تلہ غا توار بڑز کننگو۔
تنظیم نا چیرمین نصراللہ بلوچ حکومت آن خواست کرے کہ ساجد شاہوانی بے قانودی کاریم تیٹ تد ءِ تو اودے پھاش کرسا عدالت ئٹ ہتنگ مرے و صفائی نا وارخواہی تننگ مرے اگہ او بےڈوہ ءِ تو دمدستی اودے آجو کننگہ و خاہوت ئے دا ڈکھ آن آجو کننگ مرے۔
