بلوچستان لبریشن فرنٹ نا ترجمان میجر گہرام بلوچ میڈیا غا شنگ کروک تینا بیان ئٹ پارے کہ 23 فروری آ ویگہ نا بی ایل ایف نا سرمچارک بولان و سبی نا دگ ئے آب گم گرین ہوٹل و پیر غیب کراس نا جتا جہہ تئا تفسہ اُلاخ آتہ پٹ ئہ پول کریر۔
او پارے کہ سرمچار تِہ راجی آجوئی نا عملی جہد ئنا وختا حکمت عملی نا رد ئٹ جتا محاذ آتيا تینا راجی فکری و آشوبی کڑد ئے سر تروئی مریک۔ خاص وڑ ئٹ دَگ و اُلس ئنا نیامٹ تینا راجی فرض ئے سر تننگ نا وختا گوریلا جنگول آتیکن انقلابی اصول آتیا عمل کننگ و تنظیمی نظم و ضبط نا پابند مرسا آشوبی کڑد ادا کننگ اسہ سختو کاریم ئس مریک۔ ولے دن انگا ہلہلئی حالیت آتیٹ ہم تنظیم و الس ئنا نیامٹ فکری ہم آہنگی نا سیالی ئے سوگو تخنگ و راجی آجوئی نا سپاہی تِہ بکار ہدف ئے دوئی کننگ اوفتا غٹ آن بھلا سرسوبی ءِ۔
ترجمان پارے کہ درے نن بی ایل ایف نا سرمچارک بولان ئٹی کسر ئے چھار جتا جہہ تیا تفِسہ پٹ ئہ پول کریر و دا وختا اسہ سیاسی جماعت ئسے نا ایم پی اے ہم ہموکان گدرینگ ئٹی اسک۔ سرمچارک اونا سرکاری سلاہ تہ ہلکر و تنظیمی قانود نا رد ئٹ اودے بلوچ مننگ نا سوب آن شرف تسُر و ہِننگ نا موکل تسر۔
بی ایل ایف نا ترجمان پارے کہ کسر تہ تفنگ نا وختا پاکستانی لشکر نا اسہ پک اپ و اسہ بکتر بند گاڑی ئس ہموڑے سر مس تو سرمچارک اوفتیا ترندو جلہو کریر و بکتر بند گاڑی ئے راکٹ لانچر تیٹ ٹک کریر ہراڑان بکتر بند گاڑی نا اسہ بشخ ئٹ خاخر لگا و کیہی فوجی کارندہ غاک ٹپی مسُر۔
اونا پاننگ اس کہ ورندی ٹی دشمن لشکر لس مسافر تا الاخ آتیا سمکاری کرے، ننے حوال رسینگانے کہ دشمن لشکر نا سمکاری آن اسہ مسافر ئس بیران و کیہیک ٹپی مسُنو۔ واہم جنگ ئنا وختا ہیب ئہ کھیب ئنا علاقہ غا تا چوکی تیا ساڑی کارندہ غاک ہم سُمکاری کریر و مارٹر گولہ خسار۔
او پارے کہ ویگہ نا 5 آن نن ئنا 12 بجہ اسکان بولان، سبی نا دگ ئے تفِسہ کنٹرول کننگ آن گڈ جتا دُھر تیٹ بشخ مروک سرمچارک تینا جاگہ غا تیا سرسلامت سر مسُر۔
میجر گہرام پارے کہ نن میڈیا نا ذریعت ئٹ بلوچ الس و ٹرانسپورٹ مالک آتیان خواست کینہ کہ او کسر تا تفنگ نا وختا سرمچار تا رکھ ئنا خیال ئے کیر و اوفتتون تعاون کیر و اوفتا پنت آتیا عمل کیر۔
او ایسر ئٹ پارے کہ بی ایل ایف دا کاروائی تا ذمہ واری ئے ہرفک و بلوچستان نا آجوئی اسکان تینا سرزمین آ کوزہ گیر لشکر آ جلہو تہ برجاء تخون۔
