بلوچستان ئٹ سُمکاری تا جتا تُدینی تیٹ پنچ بندغ خلنگا، اَسہ بندغ ئس ٹپی مسُنے۔
شابیتی حوال تا رد ئٹ دکی ناصر کول کمپنی ٹی سول سیکیورٹی کارندہ غا تا اِرا ٹولی تیٹ سُمکاری مسُنے۔ سُمکاری آن اَسہ لس سیکیورٹی کارندہ ئس خلنگانے، و اَسٹ ئس ٹپی مسُنے۔
خلنگوکا بندغ نا چاہنداری مخان نا مار بازخان نا راج شادیزئی ناصر نا پِن ئٹ مسُنے۔ ٹپی مروکا بندغ نا چاہنداری عبدالستار نا مار صابر راج ناصر ہراکہ غریب آباد نا پِن ئٹ مسُنے۔
واشک نا جہہ سلام بیک ئٹ نا دُرست آ سلاہ بند بندغ آک سُمکاری کرسہ ایوب ملازئی پِنیئو بندغ ئسے کھسفینو۔
پاننگک کہ تومکا پارہ غا تیان سُمکاری آن ایوب ملازئی پِنیئو بندغ ئس کھسکُنے۔ سلاہ بند جلہو کارک ایوب ملازئی نا سلاہ تہ ہم دوئی کرینو۔
ہندی حوالکار تا رد ئٹ ہندا بندغ نا تعلقداری اَسہ سَرکاری مُختف ٹولی ئسے آن اسک ہرا ہند ئٹ بد ایمنی و کیہی ڈوہداری تیٹ اوار اسک۔
حب ئٹ رند مارکیٹ ئٹی خیسُن نا دکان ئسے آ نا دُرست سلاہ بند بندغ آتا سُمکاری آن باوہ مار ئتون اوار چھار بندغ خلنگانو۔ اوفتا جون تہ ہسپتال آ دننگانے۔ تُدینی آن گڈ ڈوہدارک نرانو پولیس تُدینی نا جاگہ آ سر مرسہ پٹ ئہ پول بناء کرینے۔
ہندی مخلوق نا رد ئٹ شار ئٹ برجا بد ایمنی ئے توننگ ئٹی انتظامیہ بےسوب ءِ، بندغ آک غاو کرینو کہ شار ئٹ دُزی و بےقانودی خون تیٹ جتا ٹولیک اوار ءُ ہرافتہ سرکاری مختفی دوئی ارے۔
