بلوچ اسٹوڈنٹس آرگنائزیشن نا پارہ غان ‘ جیونی نا شہید’ آتا سال دے آ جیونی ٹی سیمینار اڈ تننگا۔ سیمینار ئٹ بھلو کچ ئسیٹی الس اوار نس و شہید آتا سال دے آ اوفتہ دروت ندر کرے۔
مجلد بلوچ راجی سوت ئٹ بناء کننگا۔ مجلد ئٹ چیئرمین بی ایس او بالاچ قادر، جونئیر وائس چیئرمین عامر نزیر، سابق چیئرمین بی ایس او ایڈوکیٹ سعیدفیض، بی این پی گوادر نا صدر ماجد سہرابی و کریم شمبے تران کریر و اسٹیج نا بست و بند نا ذمہ واری تہ بی ایس او نا بنجائی کمیٹی نا باسک کرم بلوچ و جیونی ہنکین نا صدر ولید بلوچ سر تسر۔
تران کروکا پاریر کہ شہید یاسمین، شہیدازگل و شہید غلام نبی نا گواندینگ (قربانی) آتہ دروت ندر کرسا پاریر کہ 21 فروری نا دے بلوچستان کن ہمو مون انگا دے ء ہرادے آ ریاست تینا تاغت و نہاری ئٹ، دیر ئنا خواست کننگ آ جیونی نا مخلوق آ سم شلا۔
او پاریر کہ جہان ئٹ دن انگا تدینی نا مٹ رسینگپک کہ ہراڑے زند ئنا بنداوی خواست آتا خواہنگ نا ورندی دن بربریت ئٹ تننگ مرے۔ اینو سی و ہفت سال گدرینگ آن پد ہم جیونی تون اوار بلوچستان نا مخلوق دائسکان دیر کون آ بنداوی ضرورت آن پد تموک ء۔
اوفتا پاننگ اس کہ جیونی نا دا تدینی اصل ئٹ بلوچستان و اسلام آباد نا نیامٹ حاکم و محکوم نا سیالی ئے پھاش کیک۔
تران کروکا پاریر کہ ریاست بلوچستان نا راجی حق حاکمیت ئے مننگ نا جاگہ غا تاغت و توفک نا زور آ جمہوری توار آتہ لتاڑنگ نا پالیسی آ کاریم کننگ ءِ ہندا لڑ ئے برجاء تخسہ بلوچستان ئٹی کتاب اسٹال آتہ بند کننگانے و داسا بلوچ استاد و خوانندہ غا تہ ٹارگٹ کلنگ ئٹی فریشانی نا کچ اسکان گیشی بسنے۔
او پاریر کہ بلوچستان نا ہر جاگہ غا بندغ آتا بےشرفی ہڑدیئی کاریم مسنے۔
اوفتا پاننگ اس کہ بلوچ ورناک کُل ہڑاند آتیان پد ہم تینا خواننگ نا کاریم تہ برجاء تخر۔ بلوچ راجی بقاء کن دا المی ءِ کہ بلوچ ورنا با شعور مرسا تینا حق ئنا جہد آ زور تیر۔
