بلوچستان نا ضلع کیچ ئنا بنجائی شار تربت ئٹ کریم بخش نا جون ئتون اوار خاہوت تولوک برانز کننگ ءِ۔
برانز دا وختا تربت فدا احمد چوک آ برجاء ءِ، داکان مست کریم نا خاہوت اونا جون تون اوار M8 کسر جدگال ڈن (ڈی بلوچ پوائنٹ) آ برانز کننگ اس۔
خیال ئٹ مرے کہ تمپ ئنا علاقہ کوھاڈ ئٹی 20 فروری پنچ شمبے نا دے سرکاری مخ تف سلاہ بند ٹولی (ڈیتھ سکواڈ) نا کارندہ غاک چنک سن ورنا کریم بخش ئے سمکاری کرسا کھسفیسر۔
منظور نا مار کریم بخش نا جون ئتون اوار اونا خاہوت درو ایم ایٹ کسر ئے جدگال ڈن (ڈی بلوچ پوائنٹ) آ بند کرسا برانز بناء کرے۔
اینو خاہوت جون ئے تربت نا ہند فدا احمد چوک آ ہتسہ برانز کننگ ءِ۔ خاہوت نا پاننگ ءِ کہ او تمپ آن داڑے اسکان انصاف کن بسنو۔
او سوج کرسا پاریر کہ انتئے نادرست آ سلاہ بند بندغ آک اوفتا اِرا چنا شہید کریر ولے اوفتا خونیک دائسکان دزگیر مننگ افس و دا رد ئٹ ہچو کاروائی ہم مننگ اف۔
او تربت نا الس آن خواست کرینو کہ او بریر و تولوک برانز ئٹ اوار مرسا اوفتہ انصاف دوئی کننگ ئٹ کمک کیر۔
خاہوت نا پاننگ ءِ کہ ورنا تا ٹارگٹ کلنگ نا برخلاف الس پیشتمہ تاکہ دا چرجوئی ایسر مرے۔
خیال ئٹ مرے برجاء ہفتہ مہراج پنیئو اسہ پین ورنا ئس ہم ڈیتھ سکواڈ نا دو آن خلنگاسس۔ تومکا ورناک، مہراج و کریم سیال ہم پاننگرہ۔
