حوال تا رد ئٹ بلوچستان نا بنجائی شار شال آن پاکستانی لشکر 2 بندغ دزگیر کننگ آن گڈ بیگواہ کرینے۔ اندن اسہ پین جاگہ ئس چھاپہ نا وختا چنا نیاڑی تہ بیدادی نا گواچی کننگانے۔
شابیتی حوال تا رد ئٹ درو خان محمد سمالانی نا مار ظہور احمد سمالانی ئے کوئٹہ خونی تالاب، سنجیدی نا علاقہ آن نادرست آ سلاہ بند بندغ آک زوراکی ئٹ بیگواہ کرینو۔
جہی حوال تروکا تا رد ئٹ بیگواہی نا دا تدینی درو 19 فروری 2025 آ، دے ئنا 2 بجہ غا مسنے و بیگواہ کروک بندغ آک اِرا گاڑی ٹی سوار مسنو۔
پاننگک کہ ظہور احمد ئے داکان مست ہم 2018 ٹی بیگواہی نا گواچی کننگاسس و مُسہ سال اسکان اوڑا بیدادی کننگ آن گڈ ا2دے یلہ کننگاسس۔
او مہالو نا بیگواہی آن گڈ 2021 ئٹی آجو مسس و داسا اسہ وار پدا اودے زوراکی ئٹ بیگواہ کننگانے۔
اندن شال ئنا علاقہ ‘عیسی نگری’ آن پاکستانی لشکر محمد امین نا مار ندیم ئے زوراکی ئٹ بیگواہ کرینے۔
پن کروک ورنا مشکے نا علاقہ گورجک نا جہی ئس ءِ۔
حوال تروکا تا رد ئٹ درے نن یک نیم و دو بجہ نا وختا وردی بینوک ڈھکوک ادارہ غا تا کارندہ آک اُرا غان ندیم بلوچ ئے زوراکی ئٹ بیگواہ کرینو۔
ندیم نا بارو ئٹ پاننگک کہ او سیکنڈ ائیر نا خوانندہ ئس ءِ۔
اندن درے نن پاکستانی لشکر کوئٹہ نا علاقہ کلی قمبرانی ئے گھیرہ کرسا اُرا تیا چھاپہ خلکنے و دا وختا چُنا نیاڑی تیا ہم بیدادی کننگانے۔
وا ہم دا چھاپہ نا وختا ہچو دزگیری نا حوال دائسکان مونا بتنے۔
