ضلع کیچ ئنا بنجائی شار تربت نا لاء کالج ئٹی نرینہ ئہ نیاڑی خوانندہ غاک زوراکی ئٹ بیگواہ کننگوک کامل شریف و احسان سرور بلوچ نا وے آجوئی نا برخلاف ریلی کشار و کالج نا تہٹی برانز کریر۔
دا وختا خوانندہ غاک دوٹی بینر و پلے کارڈ ہرفِسہ نعرہ خلکر۔
لاء کالج نا خوانندہ غاک ایڈمن بلاک نا مون آن برانز ئے بناء کریر و ہڑتما بیگواہ کننگوک خوانندہ غا تا دمدستی و سرسلامت آجوئی نا خواست کریر۔
برانزیک پاریر کہ بلوچ خوانندہ غا تا زوراکی نا بیگواہی و سال تا سال بندی تخنگ اسہ بے قانودی کاریم ئس ءِ۔ دا زوراکی آ چُپ مروفن بلکہ اخس منکن مس توار بڑز کرسا ریاستی راہبند (آئین) آن چپ دا عمل نا برخلاف برانز کرون۔
خیال ئٹ مرے کہ کامل شریف و اونا خڑک ئنا سیال احسان سرور ئے 4 فروری آ سہب ئنا وختا بیگواہ کننگاسس ہراتم او کاریم ئسیٹ اسکول آن تربت شار آ ہناسس۔
کامل شریف اسہ پنیئو چاگڑدی شخصیت و ساچان اسکول نا ڈائریکٹر شریف زاکر نا چنکا مار و احسان سرور اوفتا خڑک ئنا سیال ئس ءِ۔
شریف زاکر ئے منہ دے مُست سلاہ بند بندغ آک، ہنوکا ہفتہ ملک آباد ئٹی سمکاری کرسا ٹپی کریسر و دا وختا کراچی نا اسپتال ئسیٹ اونا علاج مننگ ءِ۔
