بلوچ نیشنل موومنٹ نا چیئرمین ڈاکٹر نسیم بلوچ پارینے کہ بلوچ زانت کار و فکری آ بنیات آتہ منصوبہ سیٹ ٹِک کننگک۔ منَہ دے مہالو کیچ ئٹی پی ایچ ڈی اسکالر و علم دوست ورنا اللہ داد بلوچ ئے پاکستانی فوج ئنا کارندہ آک دے دے آن خلکُر کھسفیر۔ دا زوراکی نا برخلاف اونا خاہوت و بلوچ راج برانز کرے۔ ہندا نیام ئٹی استاد شریف ذاکر آ جلہو راجی سزا ٹی پین ودّیکی سے۔ مہالو آن اونا مار ئے و اسہ عزیز ئس ہم پاکستانی فوج زورئٹ بیگواہ کرینے۔
دا جتاوُ تدینی افس بلکہ پدَریسہ مرسہ کارہ، ہرافتیٹ استاد، زانت کار و خوانندہ بلوچ آتہ میڑسہ ٹِک کننگک۔ پروفیسر صبا دشتیاری، پروفیسر عبدالرزاق، زاہد آسکانی، استاد علی، ماسٹر نذیر و پین بھازا بلوچ خوانندہ آک ریاستی زوراکی نا گواچی مسّنہ۔
او پارینے کہ تربت ئٹی اللہ داد بلوچ نا کھسفنگ و استاد شریف ذاکر آ جلہو ناگمان مروکو جلہو افس بلکہ اسہ منصوبہ سے نا بشخ ءُ۔ پاکستانی فوج پگار آ چلّوکا تینا کارندہ آتا وسپہ ئٹ بلوچ زانت کاراتہ اسٹ اسٹ آ ٹِک کننگ ئٹی اے۔ دا اولیکو وار اف بلکہ بلوچستان ئٹی خوانندہ طبقہ آ جلہو آتا چرجوئی اے۔ استاد، خوانندہ و زانت کاراتہ ٹِک کننگ اسہ پھاشو حکمت عملی سے ہرانا مکست ہمو توار ئے توننگ اے، ہرا آجوئی، انصاف و بلوچ راج ئنا سما کن بش مریک۔
ڈاکٹر نسیم بلوچ نا پاننگ کہ بلوچ نا پُہی آ طبقہ آ جلہو کننگ بلوچستان نا روح آ جلہو کننگ نا بدل اے۔ دانا مکست نہ بیرہ بلوچ چاگڑد ئے علمی و فکری وڑئٹ معذور کننگ اے بلکہ خُلیس نا اسہ ہندنو ماحول ئس ودی کننگ اے، ہراڑے کس ہم زوراکی نا برخلاف توار ہفنگ نا ہمت کننگ کپ۔ دا چم بازیک بلوچ راج ئے پدبٹنگ و بےپُہی نا تارمئی تا گواچی کننگ کن کننگرہ، تاکہ ننا بروکا پیڑیک تعلیم، سما و راجی ٹیوار ئے گوئیر۔
نن جہانی مخلوق، اقوام متحدہ و بندغی حق آتا ادارہ آتا ڈوہ دارا چُپی آ زیات اُست پنّنگ نا درشانی کینہ۔ پاکستان دا چُپی آن تینکہ کسر کشیسہ بلوچ زنک ایسری ٹی ودّیکی ہتنگ ئٹی اے۔ جہانی چُپی اسہ ظالمو ریاست ئسے پین بےخُلیس کرینے، ہرا آجوئی و انصاف خواہوکاتا مروکا زوراکی آن پھاش مریک۔
بی این ایم دا غُٹ جلہو آتا افسوس کیک و تربت ئٹی مروکا زوراکی تون اوار بلوچستان ٹی برجا ریاستی ظلم ئنا جہانی تیبر آ زوت، آجو و سفاوُ پٹ ءُ پول ئسے نا خواست کیک۔ نن جہانی مخلوق آن خواست کینہ کہ او دا زنک ایسری آ چُپ کپس بلکہ زوراکی نا برخلاف عملی وڑئٹ گام ہفّر و دا ظلم آتا زمہ وارتان جہانی عدالت ئٹی ورندی ہلیر۔
چیئرمین ڈاکٹر نسیم بلوچ نا پاننگ کہ ننا جہد بیرہ لس ویل ئسے کن اف بلکہ دا ننا راجی بقا، راجی ٹیوار و بروکا پیڑی تا آجوئی نا جنگ اے۔ دنیا ئے دا حالت ئے منّوئی اے کہ نن نہ بیرہ تینا راجی آجوئی بلکہ خطہ و مُچ دنیا ٹی دہشت گردی ئے تالان کروکا ریاست نا برخلاف تنیا جنگ کننگ ئٹی اُن۔ ننے دا جہد ئٹی جہانی مخلوق و خطہ نا زمہ وار ملک آتا کمک سخت بکار اے۔ دنیا ئے سرپند مروئی اے کہ ہراتم حق و راستی نا پِتی آ پِڑ آ اسہ راج ئسے نا ساڑی آ وخت و بروکاتم سَلوک مریر، اوتم چُپی ہم جرم ئس مریک۔
