بلوچ وومن فورم نا بنجائی ترجمان بلوچستان ئٹی ریاستی دہشت گردی، بے قانودی کھسفنگ و زوراکی نا بیگواہی تیٹ بیم بش کروک کچ اسکان ودکی ئے سخت شیف خلسہ پارے کہ مکران و خاص وڑ ئٹ تربت و پسنی ٹی دا زوت ئنا تدینیک بلوچ زنک ایسری نا بھلو مثیل ءُ، ہرافتیٹ بلوچ اسکالر ئے بےدڑدی ئٹ کھسفنگ و ورنا تا زوراکی نا بیگواہیک اوار ءُ۔
ترجمان پارے کہ شریف ذاکر اسہ پِنیئو استاد و اسکالر ئس ءِ، ہرا کیہی وار جلہو و فریشانی تا گواچی مسنے۔ اونا مار و الہ مار ئس بیگواہ کننگار، ہرا ریاست نا بندغی زند ئنا برخلاف پھاش بے حسی ئے درشان کیک۔
حیات سبزل ئے 3 جولائی 2024 آ تربت آن سکیورٹی لشکر زوراکی ئٹ بیگواہ کرے۔ اونا جشوک جون 11 فروری 2025 آ پنجگور آن خننگا ہراڑان اونا خاہوت بھلو ڈکھ ئسے نا گواچی ءِ۔
اللہ داد، ہرا اسہ ورنا و سرپندو بلوچ اسکالر ئس اسک، اودے 4 فروری 2025 آ تربت ئٹی ٹِک کننگا، اونا خون بلوچ راج ئکن اسہ بھلو نسخان ئس ءِ۔
ترجمان پارے کہ بیرہ اسہ نن ئٹی یانزدہ بلوچ ورنا پسنی و کلانچ (چککُلی) آن زوراکی ئٹ بیگواہ کننگار، ہرا بلوچستان ئٹی زوراکی نا بیگواہی تا اسہ رنگ ودّنگ ئے پھاش کیک۔
اسماء بی بی، ہرا اسہ بلوچ مسڑ ئس ءِ، پنچ و شش فروری نا نیامیکو نن، جہی آ سِلاہ بند لشکر (ڈیتھ سکواڈ) نا کارندہ غاک زور ئٹ گھرسہ دریر و اونا خاہوت آ بیدادی کریر۔ مُسہ دے ئنا بیگواہی آن پد اُلس ئنا بش مننگ برانز کننگ و بلوچستان نا کسر تہ بند کننگ نا سوَب آن اونا اسہ زور ئٹ جوڑ کرِفوکو ویڈیوس شنگ کننگا ہرا پدان دروغ ئس ثابت مس۔ واہم اسماء نا آجوئی آن پد ہم اسَل ڈوہدارک اینو اسکان قانود نا دو آن پیشن ءُ۔
ترجمان ودیک پارے کہ تیبہ بلوچستان ئٹی بلوچ ورنا، چائندار و اسکالر آتہ ڈٹ بندی ئسے نا رد ئٹ ٹِک کننگک ہرا بلوچ زنک ایسری ئے پھاش کیک۔ ریاست نا دا زوراکیک بندغی حق و جہانی قانود آتا پھاش لتاڑ آکو۔ نن جہانی مخلوق و بندغی حق آتا تنظیم آتان خواست کینہ کہ او بلوچ زنک ایسری نا برخلاف گھام ہفّر و دا عمل ئے شیف خلیر۔
