نیدرلینڈ: بلوچ نیشنل موومنٹ (بی این ایم) نا ترجمان پارے کہ بی این ایم نا اسہ ڈل ئس ڈچ پارلیمنٹ نا باسک ایسا کہرامان، ایرک دیر برگ، کور پیریک و جان پیٹرنوٹ تون اوڑدئی کرے ہراٹی بلوچستان ئٹ بندغی حق آتا لتاڑ آ شابیت ئٹ تران کننگا۔ ایسا کہرامان پارلیمنٹ ئٹی دفاع، خارجہ امور و پیشن ڈیہہ تیٹی مذہبی اقلیت آتیا کاریک کیک۔ او پارلیمنٹ نا دفاعی کمیٹی نا چیئرمین ہم ارے۔
وفد ئٹی بی این ایم نا بندغی حق آتا ادارہ پانک ئنا کوآرڈینیٹر جمال بلوچ، بی این ایم نیدرلینڈز چیپٹر نا صدر مھیم عبدالرحیم بلوچ، نائب صدر وحید بلوچ، جنرل سکیریٹری دیدگ بلوچ و جوائنٹ سیکریٹری عالیہ بلوچ اوار اُسر۔ وفد ہالینڈ پارلیمان باسک آتہ بلوچستان ئٹی زوراکی نا بیگواہی، بیدس عدالت کھسفنگ، لشکر کشی و ایلو ریاستی زوراکی تا بابت ئٹ شابیتی حوال تس و پانک ئنا پارہ غان تیار کروکو اسہ پٹ و پولی کتابچہ ئس ہم اوفتہ تس۔
ڈل دا ہیت آ زور تس کہ ڈچ حکومت و جہانی کہول بلوچستان ئٹی بندغی حق آتا لتاڑ آ بے توار مفس و اوفتہ دا جیڑہ آتا تینا جوانو کڑدار ادا کروئی ءِ۔
ایسا کہرامان و ایرک وان دیربرگ بلوچستان نا حالیت آ فریشانی نا درشانی کرسا پاریر کہ دا ویل آتیا ذمہ وار تلہ غا تیا توار بُڑز کرون و بندغی حق آتا لتاڑ آ توار بُڑز کرون۔
اوڑدئی نا وختا بی این ایم نا ڈل اسہ پٹیشن ئس ہم جمع کرے ہراٹی بلوچستان ئٹی بندغی حق آتا حالیت آتا پام تننگ و دانا برخلاف جوانو گامگیج ہرفنگ نا خواست کننگا۔
