شریف ذاکر ئے کھسفنگ کن جلہو، تُربَت سول سوسائٹی نا کال آ تُربَت ئٹ شٹرڈاؤن برانز، کاروباری بنجاہک بند۔
تُربَت سول سوسائٹی نا کال آ پِنی آ چاگڑدی شخصیت و ساچان گرائمر سکول نا ڈائریکٹر شریف ذاکر ئے کھسفنگ کن اوڑا جلہو نا برخلاف اینو پنچ شمبے نادے تُربَت شار ئٹ تیبہ غا شٹرڈاؤن برانز برجاء ءِ۔
برانز نا سوب آن شار ئنا کل دکانک وکاروباری جاگہ غاک بند ءُ، بینک پیٹرول پمپ، مالیاتی ادارہ غا تتون اوار دفترک و پرائیوٹ ادارہ غاک ہم بند ءُ۔
شریف ذاکر آ جلہو نا برخلاف اینو چھار شمبے نا دے پرائیویٹ اسکول ایسوسی ایشن برانز کرسہ اسکول آتہ بند کننگ نا پڑو تسُنے۔
کیچ بار و مکُران بار ایسوسی ایشن نا کُنڈ آن عدالتی کاروائی تا بائیکاٹ نا سوب آن عدالتی کاریمک ہم رہینگانو۔
یاتی مرے کہ سئے شمبے نا دے نا دُرست آ بندغ آک شریف ذاکر ئے کھسفنگ کن اوڑا جلہو کریر، ہراڑان او ٹپی مس۔ اونا نَت تیا اِرا سُم لگا و اسپتال ئٹی اونا دارو درمان برجاء ءِ۔
