تربت یونیورسٹی نا خوانندہ احسان سرور و کامل شریف نا سرسلامت آجوئی کن یونیورسٹی نا خوانندہ غاک برانزی ریلی ئس کشار۔
دا ریلی کیمسٹری شعبہ، انگلش شعبہ و ایڈمن نا دفتر آن گدرینگسہ ایجوکیشن ڈیپارٹمنٹ نا مونا ایسر مس، ہراڑے خوانندہ غاک تینا خواست آتیکن برانز کریر۔
اوفک ہڑتما خوانندہ غا تتون اوار ایلو زوراکی ئٹ بیگواہ کننگوک بندغ آتا زوت آجوئی نا خواست کریر۔
برانز ئٹی بشخ ہلوک خوانندہ غاتا پاننگ اس کہ اوفتا مسخت بیرہ تینا سنگت آتا آجوئی اف بلکہ دا برانز نا وسپہ ئٹ دا کُلہو ہم تروئی اس کہ ریاست و ادارہ غاک زوراکی نا بیگواہی تا زیہا سوبری ئٹ گھام ہفّر۔ دا معاملہ بیرہ دا یونیورسٹی اسکان اف بلکہ مچّا بلوچستان نا ہر خوانندہ کن اسہ بھلو ویل ئس ءِ۔
او ریاست آن خواست کریر کہ احسان سرور، کامل شریف و ایلو زوراکی ئٹ بیگواہ کننگوک بندغ آتا آجوئی کن زو ئس گچین وڑ ئٹ گھام ہفّنگہ تاکہ اوفتا خاہوت آتہ تسلی مرے۔
خوانندہ آتا پاننگ اس کہ دا وڑ ئنا تدینی تا زوت و جْوان وڑ ئٹ ایسری نہ بیرہ زیمی خاہوت آتیکن المی ءِ بلکہ غُٹ چاگڑد نا سواد (فائدہ) کن ہم المی ءِ۔
