بلوچ یکجہتی کمیٹی نا نیمغان اللہ داد بلوچ نا کھسفنگ نا برخلاف شہید فدا چوک آ ارٹمیکو دے ہم گدان برجا سلیس۔ گدان آ نیشنل پارٹی و حق دو تحریک نا راہشونک ہم بسّر اواری نا درشانی کریر۔
ہنوکا دے تیٹ نادرست آ سِلابند بندغاتا دُو آن خلّنگوکا ورنا اللہ داد بلوچ نا کھسفنگ نا برخلاف اینو ارٹمیکو دے ہم شہید فدا چوک آ برانز برجا سلیس ہندن برانز ٹی ہنوکا تُو تیٹ بلیدہ ٹی خلّنگوکا ورنا نوید بلوچ و تمپ آن ظریف بلوچ نا خاہوت ہندن ہنوکا تُو ئٹی گوادر ٹی خلّنگوکا ذکریا بلوچ نا خاہوت ہم بشخ ہلک۔
داڑان ویتہ کیچ آن بیگواہ سہیل احمد، اسد بلوچ، وسیم ملنگ، تمپ آن بیگواہ اقبال بلوچ تون اوار ایلو بیگواہ بندغاتا خاہوت آک ہم بسّر اوار مسّر۔
برانز ٹی نیشنل پارٹی نا راہشونک مہالو نا ضلعی صدر محمد طاہر بلوچ، یٰسین بلوچ و ایلوفک، ہندن حق دو تحریک نا راہشونک حاجی ناصر پلیزئی،سعید جمعہ، صادق فتح و ایلوفک اوار اسّر۔ تربت سول سوسائٹی نا سمبھالوک گلزار دوست ہم بس اواری نا درشانی کرے۔
دھرنا ٹی بشخ ہلوکاتیٹی بلوچ یکجہتی کمیٹی نا مرکزی راہشون صبغت اللہ شاہ جی و ایلو نرینہ نیاڑی تا بھلو کچ ئس بشخ ہلکنے۔
برانز تروکاتا پاننگءِ کہ پھگا بی وائی سی نا نیمہ آن اسہ برانزی ریلی ئس کشّنگو، او خواست کرینو کہ پھگا بلوچ زنک ایسری نا برخلاف برانز ئٹی بشخ ہلیرے۔
