بلوچ نیشنل موومنٹ (بی این ایم) نا مرکزی جارکش پارینے کہ تنظیم نا امریکہ ہنکین نا ہنکینی دیوان صدر نبی بخش بلوچ نا بھلنی ٹی اڈ تننگا۔ دیوان نا بھلا مہمان تنظیم نا کماش ڈاکٹر نسیم بلوچ ہندن اعزازی مہمان کمک کماش ڈاکٹر جلال بلوچ اس۔ دیوان ئٹی بھازا سرہال آتا تران کننگا۔ گُڈی ٹی ساڑی آ کابینہ ئے چھٹفنگا و گچین کاری ئٹ پوسکنا کابینہ ئے جوڑ کننگا۔
دیوان ئٹی بی این ایم نا کماش ڈاکٹر نسیم بلوچ تران کرسہ پارے کہ ننا جہد ئنا مزّل بلوچستان نا آجوئی ءِ۔ ہندا جہد ئٹی بی این ایم نا راہشون تان ہلیس باسک اسکان، قربانی تا اسہ بھلو کچ ئسے۔ کماش تنظیم نا باسک آتہ سوشل میڈیا آن غیر لازمی کاریم ہلّنگ آن مُر مننگ نا پارے و فرمان تِس کہ تنظیم نا سنگتاک کسرشون غلام محمد نا جوڑ کروکا تنظیمی رہبند ئے منسہ بی این ایم نا جہد ئے مون آ دیر۔
تنظیم نا کمک کماش ڈاکٹر جلال بلوچ تران کرسہ پارے کہ اینو بی این ایم نا امریکہ ٹی داخسو بھلو کچ ئسیٹ باسک آتہ خنسہ کنکِہ دا سوچ ئنا ہیت ئسے کہ بی این ایم نا جہد آ مخلوق یقین کرسہ گیشتر اونا بشخ مننگ ئٹی ءِ۔ او پارے کہ تنظیم نا سنگتاک پوسکن بروکا سنگتاتا ہیل کاری آ کاریم کیر۔
دیوان ئٹی نبی بخش بلوچ تران کرسہ پارے کہ بی این ایم اسہ راجی ءُ تنظیم ئسے ہراڑان بلوچ راج ئے بھلو اومیت ارے۔ ہندا خاطر آن بی این ایم امریکہ ہنکین نا سنگتاتا بھلو زمہ واری ئس بریک۔ بی این ایم نا ہر سنگت تینے بلوچ نا جہدکار سرپند مرے و بلوچستان نا مقدمہ ئے دنیا نا مون آ ہتنگ کن جہد کے۔
دیوان نا ایسر ئٹ کماش ڈاکٹر نسیم بلوچ نا بھلنی ٹی مُسہ باسکی گچینکاری دستہ ئس جوڑ کننگا ہرانا باسکاک ڈاکٹر جلال بلوچ و نبی بخش بلوچ اسّک۔ امریکہ ہنکین کن صدر و نائب صدر کن مقابلہ ہندن ایلو منصب آتیک زمہ وارک ویتہ مقابلہ آن گچین کننگار۔
صدر کن سمیع بلوچ و جی آر بلوچ نا نیام ئٹی مقابلہ مس، ہندن نائب صدر کن عنایت بلوچ و میر دوست نا نیام ئٹی مقابلہ مس۔ کابینہ ٹی سمیع بلوچ صدر، عنایت بلوچ نائب صدر، امداد بلوچ جنرل سیکریٹری ، فہد بلوچ جوائنٹ سیکریٹری ، نوہا بلوچ فنانس سیکریٹری گچین کننگار۔
پوسکن گچین مروکا کابینہ ئے موارکی ترسہ ڈاکٹر نسیم بلوچ و ایلو سنگتاک پاریر کہ ننے اومیت ءِ تنظیم نا سنگتاک امریکہ ٹی بلوچ و بلوچستان نا آجوئی نا سوج ئے دنیا نا مون آ جوانی ئٹ پھاش کرور۔
