بلوچ یکجہتی کمیٹی نا راہشون صبغت اللہ شاہ جی و ایلوفک تربت پریس کلب ئٹی پریس کانفرنس کرسہ نُہہ فروری آن یانزدہ فروری اسکان شہید فدا چوک آ تولوک برانز نا پڑو کرینو۔
اوفتا پاننگ ء کہ تولوک برانز نا مسخت بلوچستان ئٹی برجاء غا ریاستی زوراکی، زورئٹ بیگواہی و بلوچ ورنا تا خلّنگ کھسفنگ نا برخلاف توار ہفّنگ ء۔
راہشون تا پاننگ ء کہ ہنوکا منَہ تُو ئٹی بھاز آ بلوچ ورنا تہ زور ئٹ بیگواہ کننگ آن پد بے قانودی کھسفنگانے۔ ہرافتیٹ کراچی یونیورسٹی آن فارغ مروک اللہ داد بلوچ نا تربت ئٹی کھسفنگ، آواران ئٹی فقیر جان سید محمد، عصا بلوچ و نورالدین نا شہیدی، گوادر ئٹی زکریا بلوچ و خضدار زہری ٹی شانزدہ سالی آ ورنا درنا نا کھسفنگ ریاستی زوراکی نا پوسکنو مثال ءُ۔
بی وائی سی نا رد ئٹ ریاستی ادارہ غاک بلوچ ورنا تہ خواننگ و شون ئنا کسر آن مُر کننگ کن خُلیفنگ و زوراکی ئٹ کاریم ہلّنگ ئٹی ءُ۔ ولے بلوچ راج مدام جہد کرینے و او اسُل زوراکی نا برخلاف چُپ رہینگوف۔
راہشونک پڑو کریر کہ تولوک برانز ئٹ شہید آ ورنا تا خاہوت آک، بندغی حق آتا جہدکارک و ایلو پلک آتان بندغاک بشخ ہلور۔ او کیچ ئنا اُلس آن خواست کریر کہ او گیشتر کچ ئٹ بشخ ہلسہ شہید آتہ دروت ندر کیر و ریاستی زوراکی تا برخلاف تینا مزاحمت نا درشانی ئے کیر۔
بلوچ یکجہتی کمیٹی پھاش پارے کہ ہراتم اسکان زوراکی نا بیگواہی، خلّنگ کھسفنگ و بندغی حق آتا لتاڑ چھٹّتنے، اوفتا برانز برجاء مرو۔
