بلوچ نیشنل موومنٹ (بی این ایم) نا کماش ڈاکٹر نسیم بلوچ تینا درشان ئٹی پارینے کہ خضدار ئٹی دہ سال آن گیشتر مرو کہ آسمہ و اونا خاہوت زور ئٹ ہمپنگ، خلّنگ بٹنگ و ریاستی کمک ئٹ کاریم کروکا جہی آ سلاہ بند لشکر (ڈیتھ سکواڈ) نا زوراکی تا گْواچی مرسہ بسّنے۔
او پارے کہ داسا اودے ہموفک زور ئٹ بیگواہ کرینو ہرافک اونا دشتار ئے ہموتم کھسفیر ہراتم او زور ئٹ برام کننگ آن نمن مسس۔
چئیرمین نسیم بلوچ پارے کہ دا زوراکی تیکن دا لشکر ئے تیبہ یلہ النگانے و دافتا بَج ئٹ پاکستان پیپلز پارٹی نا نواب ثناء اللہ زہری نا دُو ارے، ہرانا ذاتی آ سلاہ بند لشکر بلوچستان ئٹی پھاش زوراکی کننگ ئٹی ءِ۔
او پارینے کہ رحیم بخش و ظہور جمالزئی آن بارنگا ڈوہ دارک، ہرافتا بھاز آ بیگواہی، خلّنگ کھسفنگ و زوراکی تیٹ دُو ارے۔ اینو ہم پاکستانی ریاست نا کمک نا سوَب قانود نا دو آن پیشن ءُ۔
ڈاکٹر نسیم بلوچ نا ايسر ٹی پاننگ اس کہ دا بیرہ بندغی حق آتا لتاڑ ئس اف بلکہ جنگی ڈوہ ئس ءِ۔ بلوچ نیاڑی تا زور بیگواہی و زوراکی آ افسوس کروئی ءِ۔ دنیا ئے پاکستان آن بلوچستان ئٹی کروکا زوراکی تا ورندی ہلوئی تمّو و آسمہ جتک نا زوت آجوئی نا خواست کروئی تمو۔ چُپی زوراکی تو سلِنگ نا بدل ءِ، جہانی بندغی حق آتا تنظیم آتہ، جہدکار و جہانی ادارہ آتہ زو ئس گام ہفّوئی ءِ۔
