دشت میرانی ڈیم ئٹ زمین داری نا پیشہ تون تفوک رحمت خان مہکانی مری تربت پریس کلب ئٹ پریس کانفرنس کرسا پارے کہ اونا بھلا ایلم سانول خان مری ولد احمد خان مہکانی مری ئے 13 فروری 2013 آ نوتال نیشنل ہائی وے سبی بختیار آباد آن بیگواہ کننگا۔
او پارے کہ ہراتم نن سندھ آن ہنپسہ کوہلو آ ہننگ اسن تو کسر ئٹ ننا گاڑی ئے توننگا و اِرٹنگا ایلم تا مونا مونو چادر ئس شاغسہ نادُرستو جاگہ ئس دننگا۔ 13 توو دزگیری ٹی مننگ آن پد کنے آجو کننگا ولے کنا ایلم دائسکان بیگواہ ءِ۔
او پارے کہ ای میرانی ڈیم ئٹ زمین داری کننگ اُٹ ولے وار وار جتا ادارہ و تھانہ تیٹی کنے خواہیفنگک۔ کمشنر سبی بیگواہ کننگوک آ بندغ آتا خاہوت آتہ کوائف مُچ کننگ نا پڑو کرے گُڑا ای تینا ایلم نا کاغد آتہ ہموڑے تسٹ اوکان بیدس ڈیرہ مراد جمالی ٹی جے ای ٹی نا مونا پیش مسٹ و تربت پولیس تھانہ ٹی ہم کنے خواہفنگا ولے دا کُل آن پد ہم کنے انصاف رسینگتو۔
او پارے کہ کنا ایلم میار ئس کرینے گُڑا اودے عدالت آتیٹ سزا تننگ مرے ننے مسلہ اف اگہ او بے ڈوہ ءِ تو خدا کن اودے مونی ہتنگہ۔ ای وام تیٹی بڈینگانٹ کنا چنکو چُنا ء ہرافتا اسٹ انگا سہارہ اُٹ ای، حکومت و ادارہ تیان انصاف خواہیوہ کہ کنا ایلم ئے آجو کننگ مرے تاکہ ننا تکلیف و پریشانیک ایسر مریر۔
