شاہی تمپ تربت نا جہی نور بخش نا مار عطاء اللہ و بہمن نا جہی یاسین حمید نا ایڑک تربت پریس کلب ئٹی پریس کانفرنس کرسا تینا ایلم تا زوراکی ئٹ بیگواہی آ سخت فریشانی نا درشان کریر و اوفتا زوت آجوئی نا خواست کریر۔
عطاء اللہ نا ایڑ پریس کانفرنس کرسا پارے کہ اونا ایلم ئے 13 اکتوبر 2024 نا نن نادُرست آ بندغ آک دزگیر کرسا دریر ہراکان گڈ اونا آجوئی کن فدا چوک آ برانز کننگا۔
او پارے کہ برانز نا وختا اسسٹنٹ کمشنر تربت گپ تران (مزاکرات) آن پد مُسہ ہفتہ ٹی اودے یلہ کننگ نا باور تس ہراڑان گڈ برانز ایسر کننگا۔ ولے اسہ توُ سے آن پد ہم دا بارو ئٹ ہچو دیمرئی متنے۔
او پڑو کریر کہ اگہ مُسہ دے ئٹی اوفتا بندغ آک آجو متور گُڑا ہموتم اسکان تولوک برانز کرون ایسکان کہ ننا بیگواہ غا بندغ آتِہ پھاش کتنو۔
او پاریر کہ عطاء اللہ اسہ مزور ئس اسک ہرا پُچ گھنڈسہ تینا اُرا نا خڑچ ئے چلِفیکہ و اونا بیگواہی ئے چھار توُ پورو مسنے ولے کالخواک بے توار تماشائی ءُ۔
اوفک حکومت و ذمہ وار ادارہ تیان خواست کریر کہ اگہ اوفتا ایلم تیا دوبہ ئس ارے گُڑا اوفتہ عدالت ئٹ ہتنگ مرے یا تو زوت آجو کننگہ۔ خاہوت پارے کہ لُمہ باوہ سخت پریشان ءُ و حکومتی بے تواری اوفتیکن پین تکلیف دہ ءِ۔
