بی ایس او شال ہنکین نا ترجمان تینا شنگ کروکو بیان ئسیٹی پارینے کہ بولان میڈیکل کالج نا انتظامیہ نا کنڈ آن فرسٹ ایئر نا خوانندہ غاتیان اسہ تعلیمی سال ئٹی ارا وار ہاسٹل فیس ہلنگ نا مذمت کینہ۔ دا پیسہ غا تہ انتئے ہلنگ ءُ وختس کہ اولیکو سال نا خوانندہ غاتہ الاٹمنٹ تننگانے و نئے ہاسٹل ئٹی جاگہ تننگانے؟ کالج انتظامیہ تینا دا روشت ئے تور۔
بلوچ خوانندہ غاک مہالو آن نیستی و بدحالی نا گواچی ءُ و اوفتا پین مالی بوجھ شاغسہ تعلیمی کسر ئٹی پین ہڑاند سلفنگ ءُ۔ اولیکو مسہ تو اسکان ہاسٹل ئے بند تخسہ خوانندہ غاتا تعلیمی سرگرمی تہ بھاز زیمی کننگا و ولدا کالج نا لائبریری ئے ہم مسہ چھار تو اسکان بند کننگا ہراکہ خوانندہ دژمن پالیسی تا ثبوت ءِ۔
کالج انتظامیہ و ایلو کالخواک تینا زمہ واری تیان پدی مننگ نا جاگہ غا خوانندہ غاتا معمولی مشکل آت بہانہ جوڑ کرسہ تینا نااہلی ئے ڈھکنگ ءُ، ہراکہ اسہ بھلو ڈوہ ئسے نا بریبر ءِ، بی ایس او کالج انتظامیہ ئے پائیک کہ او تینا خوانندہ دشمن پالیسی تیان پدی مریر۔
