کاؤنٹر ٹیررازم ڈیپارٹمنٹ (سی ٹی ڈی) حب چوکی آن پولیس نا دو آن زوراکی ئٹ بیگواہ کننگوک، حب ساکران نا جہی چاکر بگٹی نا دزگیری ئے پھاش کرے و اوڑا خلوکا دوبہ غا تا ایف آئی آر ئے ہم مونا ہیس۔
سی ٹی ڈی نا پارہ غان ایف آئی آر ئٹ چاکر بگٹی نا تعلقداری ئے بلوچ لبریشن آرمی (بی ایل اے) تون گھنڈنگانے و پولیس ٹولی آ چغلی بمب جلہو نا دوبہ خلکنے۔
چاکر بگٹی نا خاہوت نا پاننگ ءِ کہ 15 نومبر 2024 آ حب چوکی آن پولیس ایس ایچ او سعود و پاکستانی ڈھکوک ادارہ غاک اودے دزگیر کریر، ہراکان گڈ او بیگواہ اس۔
چاکر بگٹی نا خاہوت نا پارہ غان مسہ دے آن حب بھوانی نا خڑک ایلو بیگواہ کننگوک بندغ آتا خاہوت آتون اوار برانز برجاء اس ہرادے درو انتظامیہ تون گپ تران آن گڈ بیست دے اسکان پد بٹنگا۔
ایلو پارہ غان چاکر بگٹی نا خاہوت کاؤنٹر ٹیررزم ڈپارٹمنٹ نا دا ایف آئی آر ئے سختی ئٹ رد کرسا پارینے کہ اوڑا دروغو دوبہ خلنگانے۔
