حب چوکی ٹی، زوراکی ئٹ بیگواہ کننگوخ بندغ آتا خاہوت آتا پارہ غان تولوک برانز برجاء ء، ہرا نا سوب آن کراچی آن کوئٹہ غا ہنوکا بنجائی کسر الاخ آتا ہن ئہ بر کن بند ء۔
پاکستانی لشکر نا دو آن زوراکی ئٹ بیگواہ کننگوک ارا ایلم، جنید حمید و یاسر حمید تون اوار چاکر بگٹی نا خاہوت مسہ دے آن حب ئنا علاقہ بھوانی نا جہہ آ بھلا کسر ئے بند کرسا برانز کننگ ء۔ برانز نا سوب آن کراچی نا کوئٹہ، گوادر و ایلو علاقہ غا تتون زمینی حوال پنانے۔
کسر آ تولوک برانز نا سوب آن کیہی الاخ آک گھٹ مسنو و انتظامیہ تون کیہی وار گپ تران ہم بےسوب مسنے۔
استو ننکان ضلعی انتظامیہ تون برانزی تا گپ تران بےسوب مس، انتظامیہ نا رد ئٹ چاکر بگٹی ادارہ تتون ء و اونا خاہوت ئے اوڑتون فون آ ہیت کرفنگ مریک۔
استو ایس پی حب رانا معروف عثمان، اے ڈی سی حب، چیرمین ایم سی حب بابو فیض شیخ، پن مروک وائس چیرمین ایم سی حب عظیم سیاں، ایس ایچ او حب سٹی قادر شیخ، ایس ایچ او بیروٹ گل حسن، ایس ایچ او ہائیٹ عبدالجبار رونجھو و ایلوفک برانزی تتون گپ تران کن بسر ولے ہچو بھرم پیشتمتو۔
گپ تران کن بروکا حکومتی ڈل پارے کہ چاکر بگٹی آ ایف آئی آر کننگانے اودے پھاش کننگو ولے او ہچو ایف آئی آر خاہوت ئے تننگ کتور ہرا نا سوب آن برانزیک است جم مننگ کتور۔
خاہوت نا پاننگ ء کہ اگہ او ڈوہ ئس کرینو تو اوفتہ عدالت آتیٹ ہتنگ مرے و پھاش کننگ مرے۔
برانزیک پاریر کہ ننا بندغ آتا آجوئی اسکان برانز برجاء مرو۔
