بلوچستان لبریشن فرنٹ نا ترجمان میجر گہرام بلوچ تینا شنگ کرون بیان ئٹی پارے کہ سرمچارک کولواہ ٹی پاکستانی لشکر نا کاروان آ جلہو کریر ہرا نا سوب آن دشمن نا ارا کارندہ مرگ ئنا گواچی و اسٹ ٹپی مس۔
او پارے کہ 28 جنوری نا دے سئے بجہ غا سرمچارک کولواہ رودکان نا جہہ آ سنگر ہلسہ کوزہ گیر پاکستان لشکر نا ارا گاڑی ئے ٹک کریر ہرا نا بھرم ئٹ کوزہ گیر لشکر نا ارا کارندہ مرگ ئنا گواچی و اسٹ ٹپی مس۔
اونا پاننگ اس کہ کوزہ گیر لشکر نا دا کاروان ڈاکٹر آتا اسہ ٹولی ئسے تون بسس ہرا علاقہ نا الس ئے تینا اڈ تروک استعماری پالیسی (Heart and Mind Operation) تا رد ئٹ آسراتی تا پن آ مخلوق نا است ئٹ جاگہ کننگ آ کاریم کننگ نا کوشست ئٹی اسر کہ واپسی آ سرمچارک سنگر ہلسہ اوفتا جلہو کریر، جلہو ئٹ لشکر نا گاڑی تہ ہم نسخان تسر۔
ترجمان پارے کہ بلوچستان ئٹی ریاست نا کنڈ آن مخلوق نا است ئٹ جاگہ کننگ نا پالیسیک بےسوب مسنو ہرا نا اندازه ریاست ئے چلفوکا آرمی افسر آتہ مسنے اندا سوب آن او اسہ وار پدا تینا بےسوب پالیسی تیا کاریم کرسا انسداد انسرجنسی پالیسی تہ سوگو کننگ خواہرہ ولے بلوچ وطن ئے رکھوکا سپاسہیک (سرمچارک) ہر وڑ ئنا چم بازی تہ بےسوب کننگ کن تیار ءُ۔
میجر گہرام بلوچ ایسر ئٹ پارے کہ بلوچستان لبریشن فرنٹ دا جلہو نا زمہ واری ئے ہرفک و بلوچستان نا آجوئی اسکان کوزہ گیر لشکر آ ننا جلہوک برجاء مرور۔
