بلوچستان نا سنعتی شار حب چوکی آن بیگواہ کننگوک یاسر حمید، جنید حمید و چاکر بگٹی نا خاہوت آک اوفتا زوراکی ئٹ بیگواہی نا برخلاف برانز کرسا بنجائی کسر ئے بند کرینو۔
زوراکی ئٹ بیگواہ کننگوک جنید حمید، یاسر حمید و چاکر بگٹی نا خاہوت آک تینا بندغ آتا بیگواہی نا برخلاف بھوانی نا جہہ آ کراچی آن کوئٹہ غا ہنوکا بُنجاہی کسر ئے ہر وڈ ئنا ہن ئہ بر کن بند کرینو۔
کسر بند مننگ نا سوب آن کراچی نا، کوئٹہ گوادر و ایلو علاقہ غا تون زمینی حوال پنانے۔
بیگواہ کننگوک یاسر و جنید حمید ایلم ءُ ہرافتا ایڑھ ئنا پاننگ ء کہ کنا ایلُم تِہ چھار تو مُست ریاستی ادارہ غاک بےقانودی دزگیر کرسا بیگواہ کرینو و دائسکان ننے اوفتا بارو ئٹ ہچو حوال رسینگتے کہ اوفک انت ڈوہ ئسے نا سزا ٹی بند ءُ۔
یاسمین حمید پارے کہ کنا ایلُمک مزور ءُ اوفتا ہچو سیاسی یا بےقانودی کاریم تیٹی ہچ وڑ ئنا تعلقداری اف، اوفتہ زوراکی ئٹ بیگواہ کننگ قانود ئے لتاڑنگ نا عمل ئس ء۔
او پارے کہ ننا خواست ء کہ دا بیگواہ کننگوک بندغ آتِہ زوت پھاش کننگ مرے و زوراکی ئٹ بیگواہی کون آ بے بندغی عمل ئے ایسر کننگہ۔
جہی بست و بند برانزی تیا کسر ئے ملنگ کِن ڈل ئس رائی کرے، ولے برانزی تا پاننگ ء کہ نن تینا بندغ آتا آجوئی ئسکان کسر تہ بند ملوفن۔
