بلوچستان لبریشن فرنٹ نا جارکش میجر گہرام بلوچ میڈیا ٹی شنگ کروک تینا درشان ئٹی پارینے کہ سرمچارآک کراچی نا جہہ کاٹھور ئٹ پولیس چوکی و تمپ نا جہہ گومازی و آسیاباد ئٹی کوزہ گیر لشکر ئے ٹک کریسہ جانی و مالی نسخان تسر۔
جارکش پارے کہ استو گڈاپ کراچی نا جہہ کاٹھور ئٹی بحریہ ٹاؤن پروجیکٹ نا سیکیورٹی آ سلوک پولیس چوکی ئے پوسکنا سلاہ تیٹ ٹک کریر ہراٹی سوب آن پولیس کارندہ آتے جانی نسخان مون تروئی تما۔ پولیس نا دا چوکی بحریہ ٹاؤن نا منصوبہ تہ رکھ اکن ہشت توو مست اڈ کننگانے۔
جارکش پارے کہ بحریہ ٹاؤن ہرا بلوچ آتا زمین تیا کوزہ کریسہ جوڑ کننگاسس، ہرا سندھ حکومت و سندھ پولیس نا کمک آن پورو مسنے۔ بلوچ الس و ایلو مظلوم راج آتے تنبیہ کننگک اوفک پولیس و ایلو سیکیورٹی کارندہ تیان مر مریر انتئیکہ سرمچارآک اوفتے ہروخت ٹک کننگ کیرہ۔
جارکش مُستی پارے کہ ایلو جلہو ئٹی سرمچارآک 28 جنوری نا شام 10:30 آ تمپ، گومازی ٹی کوزہ گیر لشکر نا کیمپ آ اے ون گولہ خلکر ہرا کیمپ ئنا تہٹی تمار ہرانا سوب آن کوزہ گیر دشمن لشکر ئے جانی و مالی نسخان رسینگا۔
ہندا کیمپ بی ایل ایف نا شہید سنگت سرمچار جہانگیر عرف کیپٹن نا اراغا کوزہ کریسہ جوڑ کننگانے۔
اسہ پین جلہو ئسیٹی 28 جنوری نا شام 8 بجہ تمپ ئنا جہہ آسیاباد ئٹی ساڑی کوزہ گیر لشکر نا چوکی ئے کیہی اے ون گولہ خلکر ہرا کیمپ ئنا تہٹی تمار دا جلہو ئٹی ہم کوزہ گیر ئے جانی و مالی نسخان مون تروئی تما۔
جارکش ایسر ئٹ پارے کہ بلوچستان لبریشن فرنٹ دا مسٹ انگا جلہو تا زمہ واری تے ہرفک و بلوچ سرزمین نا آزاتی اسکان کوزہ گیر لشکر ئے ٹک کرون۔
