بلوچ نیشنل موومنٹ نا بندغی حق آتا ادارہ (پانک) بلوچستان نا ضلع آواران نا ہند مشکے مزار آباد ئٹی پاکستانی لشکر نا دُو آن سومار نا مار پنڈوک نا بیدس عدالت کھسفنگ ئے شیف خلسہ پارے کہ 14 جنوری 2025 آ غلام رسول نا مار شعیب دلمراد نا مار ایوب تون اوار سومار نا مار پنڈوک ئے اراغان زوراکی ئٹ بیگواہ کننگ و پنڈوک ئے بیدس عدالت کھسفنگ آن مُست اوڑا بیدادی کننگانے۔ اونا جون ئے 25 جنوری آ خاہوت نا دُوٹی تننگانے۔ اندن شعیب و ایوب ئے داکان مُست یلہ کننگاسس۔
او پارے کہ دا نہار کون آ عمل ئٹ بلوچستان ئٹی بندغی حق آتا بھلو کچ ئسیٹ لتاڑ مننگ ءِ۔ داٹی زوراکی نا بیگوائی، بیدادی و بیدس عدالت کھسفنگ اوار ءِ۔ دا نا شاہد آتہ خلیفنگ و خاہوت ءِ چُپ کننگ کن انٹرنیٹ ئے بند کننگانے۔
او مُستی پارے کہ پانک ہمو گھام تہ زوت ایسر کننگ و سومار نا مار پنڈوک نا خون ئنا آزادانہ پٹ ئہ پول و علاقہ ٹی انٹرنیٹ ئے ملنگ نا خواست کیک۔ جہانی کہول پاکستانی سرکار آن ورندی ہلسہ بلوچ اُلس ئے انصاف تننگ کن کاریم کے۔
