کوہلو ٹی سلاہ بند بندغ آک استو پاکستانی لشکر نا چوکی آ جلہو کریسُر، جلہو ئٹی اِرا کارندہ نا کھئینگ پک مسنے۔
شابیتی حوال تا رِد ئٹ مرگ ئنا گواچی مروک کارندہ غا تیان اسٹ راہب حسین ولد غلام حیدر نا پن ئٹ درست مسنے ہرا بلوچستان نا جہی ئس ءِ، و ایلو آزاد کشمیر نا جہی ئس ءِ ہرا نا پن دائسکان چاننگ متنے۔
یات مرے کہ اسِتو ننکان سلاہ بند بندغ آک پاکستانی لشکر نا چوکی آ جلہو کریسُر۔ جلہو آن گڈ سلاہ بند بندغ آتا پد ئٹ سرویلینس ڈرون کیمرہ بال تننگاسس ولے سلاہ بند بندغ آک ڈرون کیمرہ ئے خلکُسر۔
اوکان پد لشکر نا کمک ئٹ بروکا ڈیتھ اسکواڈ نا کارندہ غاتا سلاہ بند بندغ آک جلہو کرسا اوفتِہ پدی کریسر۔
اندن بولان ئٹی پاکستانی لشکر نا اسِہ چیک پوسٹ ئسے سلاہ بند بندغ آک ٹک کریر، جلہو نا وختا دہ تُرندو تراخ و سُم کاری تا توار بِننگ مسس۔
اندن پاننگک کہ لشکر ئے دا جلہو ئٹ ہم بھاز نُسخان مسنے، دائسکان دا جلہو تا زمہ واری ئے ہچو تنظیم ئس ارفتنے۔
