“بلوچ زنک ایسری” نا پن ئٹ دالبندین ئٹی بلوچ یکجتی کمیٹی نا کنڈ آن اڈ ہلوک جلسہ کن تیاریک پورو، کاروانک جلسہ جاہ آ بننگ کن راہی مسنو۔
علاقے ٹی موبائل انٹرنیٹ بند کننگانے۔ کامریڈ گلزادی بلوچ میڈیا تون ہیت کرسا پارے کہ 25 جنوری نا جلسہ نا غٹ تیاریک ایسر مسنو، دا رد ئٹ بیرہ بلوچستان آخہ بلکہ اوغانستان و ایران ئٹی رہینگوکا بلوچ آک ہم بننگ نا کوشست کننگ ءُ۔ ولے ریاست جتا جاگہ غا تیا ہڑاند ودی کرینے و مخلوق ئے جلسہ ٹی اوار مننگ آن توننگ ءِ۔
او پارے کہ دا غٹ ڈاکٹر ماہ رنگ بلوچ ئے بِننگ کن بَننگ ءُ انتئے کہ ڈاکٹر ماہ رنگ بلوچ دا وختا بندغی حق آتا رد ئٹ اسہ تاغت تخوکو توار ئس جوڑ مسنے و بیگواہ غا بندغ آتا خاہوت آتیکن اسہ اومیت ئس ءِ۔
او پارے کہ ہمر گوادر راجی مچی نا وختا ریاست ہرا روشت ئے تخاسس و زالبول تیا بیدادی کرے او غٹ ئنا موناٹو ولے ہرا ردعمل بلوچستان نا بھاتی تا پارہ غان و بلوچ یکجتی کمیٹی نا پارہ غان بس اودے ہم ریاست خنا۔ اینو اسہ وار ولدا ریاست نا ہمو روشت مونا بننگ ءِ ولے نن اودے پاننگ خواہنہ کہ بلوچ اسُل کاٹُم شیف کتنے نئے کہ دمدرینگانے۔
اگہ اسہ وار ئس پدا ریاست دالبندین جلسہ ئے بےسوب کننگ نا کوشست کرے گُڑا دانا ری ایکشن بھاز خطرناک مرو۔ دالبندین ئٹی مروکا جلسہ ٹی بلوچستان نا جتا جتا ہند آتیان بیگواہ انگا بندغ آتا خاہوت آتا بھلو کچ ئس ساڑی ءِ و دالبندین نا سمائی آ الس ہرا وڑ آ ننے شرف تسنے دا تینٹ ریاست نا بیانیہ ئے رد کننگ کن بس ءِ۔
او پارے کہ اسلامی جمہوریہ پاکستان ئے داسا کلہو تینہ کہ اگہ او بلوچ زنک ایسری آن دو کشیتو تینا بیدادی تِہ الیتو، کُشت و خون ئے الیتو، گُڑا بلوچ نا ہرا رد عمل مرو اوڑا اودے افسوس آن بیدس ہچ ئس رسینگپرو۔ داسا پر ایمن انگا بندغ آک پر ایمن برانز کیرہ پین جنگ ئس خوائیپسہ امن خواہیرہ انتئے کہ نن بھاز جون ہرفینن، اشتماری قبر آتِہ خنانن داسا بس کبو نن پین جون ہرفپرون۔ پر ایمن برانز ئے ایسر کننگ نا کوشست کپبو اگہ نہ تو دانا رد عمل بھاز خراب مرو۔
