زرمبش رپورٹ
بلوچ اسٹوڈنٹس ایکشن کمیٹی، ہرا 2009 ئٹی جوڑ مس، تدوکا شانزدہ سال ئٹی تینا تنظیمی پالیسی و عملی کڑد ئنا ذریعت ئٹ بلوچستان نا غٹ آن زیات کاریم کروک خوانندہ تنظیم جوڑ مسنے۔ دا تنظیم دیہاڑ، جہد و شعور نا روشنائی تالان کننگ کن چاننگک۔ خاص وڑ ئٹ کتاب کاروان نا دود، ہرا جتا وخت آتیٹ بلوچستان نا جتا شار تیٹ برجاء مسنے، اسہ پھاشو پہلو ئس ءِ۔
برجاء دے تیٹ بلوچ اسٹوڈنٹس ایکشن کمیٹی بلوچستان تون اوار کراچی ٹی کتاب کاروان نا پوسکنو لڑ ئس بناء کرینے، ہراٹی جتا شار تیٹ کتاب آتا اسٹال اڈ تننگانے۔ واہم ریاستی ادارہ غا تا پارہ غان دا علمی تحریک ئے توننگ نا کوشست پھاش وڑ ئٹ خننگ مریک۔ نصیر آباد ئٹی خوانندہ غا تِہ بیم ئنا گواچی کننگا، و گوادر ئٹی اڈ ہلوک بک اسٹال آ پولیس ارش کرے، خوانندہ غا تِہ تنگ کننگا و کتاب آتون اوار اوفتِہ تھانہ غا دننگا۔ دا عمل چائند دشمنی (علم دشمنی) نا گندہ غا مثیل آتیان اسٹ ءِ۔
بلوچستان ہمو خطہ ءِ ہراڑے ریاستی مخ تفی ٹی کُشت و خون، نشہ بہا کننگ و ایلو چاگڑدی گندئیک لس ءُ۔ ایلو پارہ غان، سماء و چائنداری تالان کروکا خوانندہ غا تِہ زوراکی نا بیگواہی تتون مون تروئی تمک، و گیشتر اوفتا جشوک جون تِہ ویران آ جہہ تیا خسنگک۔ ریاست نا مخ تفی ٹی کاریم کروک سلاہ بند ٹولیک (ڈیتھ اسکواڈز) نہ بیرہ الس ئے بیم ئنا گواچی کیرہ بلکہ اوفتِہ نشہ بہا کننگ نا پھاش آجوئی تننگانے، تاکہ بلوچ چاگڑد تباہی نا گواچی مرے۔
کتاب اسہ اندنو تاغت ئس ءِ ہرا بندغ ئے سمائی (شعور یافتہ) کیک۔ و کتاب آتیا رکھ یا اوفتا بہا ئٹ ہڑاند ودی کننگ اسہ چاگڑد ئسے زمزیر آتیٹ تفنگ نا بریبر ءِ۔ بلوچ اسٹوڈنٹس ایکشن کمیٹی نا کوشست بلوچ قوم نا سماء ءِ زندہ تخنگ نا چیدہ ءِ۔ ریاست نا پارہ غان کتاب کاروان ئے توننگ نا کوشست بندغ آتا سماء و چائند آ رکھ خلنگ نا پھاش مثیل ئس ءِ، ہرادے ہخس شیف خلنگ مرے ہم کم ءِ۔
بلوچ اسٹوڈنٹس ایکشن کمیٹی ساندہ کتاب و علم ئنا تاغت آ باور کرینے و دا جہد ثابت کیک کہ چائند دشمن آک اخس خلیس نا گواچی ءُ۔ ولے کتاب آتا روشنائی ئے زمزیر تیٹ تفنگ منکن اف۔
