بلوچستان لبریشن فرنٹ نا ترجمان میجر گہرام بلوچ میڈیا ٹی شنگ کروک تینا بیان ئسیٹی پارینے کہ سرمچارک دشت و تمپ ئٹی کوزہ گیر پاکستانی لشکر آ جلہو کرسا دشمن ئے جانی و مالی نُسخان تِسر۔
او پارے کہ سرمچارک بیست جنوری آ نن ئنا 7:20 منٹ آ کیچ ئنا علاقہ دشت بل نگور ئٹی کوزہ گیر پاکستانی لشکر نا بُنجاہی کیمپ آ بھلا و چُنکا سلاہ تیٹ جلہو کرسا دشمن لشکر نا اسِہ کارندہ ئس مرگ ئنا گواچی کریر و اِرٹ ٹپی مس۔
اونا پاننگ اس کہ سرمچارک کیمپ ئنا رکھوک چوکی تِہ بھاز خُڑک آن ہموتم ٹک کریر ہراتم اوڑے لشکر نا پنچ کارندہ ساڑی اس، جلہو آن پد چگرو مروک دشمن لشکر لس آبادی تیا ہُرے اسکان سُم کاری کرے۔
میجر گہرام پارے کہ پین اسِہ جلہو ئسیٹی سرمچارک بیست جنوری نا نن ہشت بجہ غا پُل آباد تمپ کسانو ٹی کوزہ گیر لشکر نا چوکی آ پوسکُن و بھلا سلاہ آتیٹ جلہو کریر جلہو ئٹی دشمن لشکر ئے جانی و مالی نُسخان مس۔
او ایسر ئٹ پارے کہ بلوچستان لبریشن فرنٹ تومکا جلہو تا زمہ واری ئے ارفِک و سرزمین نا تیبہ آجوئی اسکان کوزہ گیر پاکستانی لشکر آ جلہو تِہ برجاء تِخنگ نا عزم کیک۔
