بلوچستان لبریشن فرنٹ نا میڈیا سیل آشوب 10 نومبر 2024 آ دشت ئنا جہہ کھڈان ئٹ لشکری کیمپ آ کروک جلہو نا ویڈیو ئے شنگ کرینے۔
ویڈیو ٹی بی ایل ایف نا سرمچارک 25 و 30 میٹر نا مری آ لشکری کیمپ آ جلہو کننگ آ خننگ مریرہ ہرافتتون پوسکن و بھلو سلاہ تُد ءِ۔
ویڈیو نا بناء ئٹ سرمچارک بھلو کچ ئسیٹ مشی جہہ تیا تینا مشن کن ہننگ آ خننگ مریرہ، ہراٹی خننگ مریک کہ سرمچار آتِہ پوسکن و کبینو سلاہ تُد ءِ۔
اندن سرمچار آتا اسہ ٹولی ئس کسر آ ہڑاند شاغنگ آ خننگ مریک ہرا پھاش وڑ ئٹ چاننگک کہ دا لشکری کیمپ ئنا کارندہ غا تا کمک کن بروکا قافلہ غاتِہ ٹک کننگ نا ڈٹ بندی ئس ءِ۔
اندن وڈیو ٹی خننگ مریک کہ سرمچارک شام ئنا تارمئی ٹی دژمن کارندہ غا تا کمک کن بروکا اسہ قافلہ ئے ٹک کیرہ۔
سرمچارک دشمن لشکر نا خڑک ئٹ گیڈ آتا چھت آ تیا لگنگ و ترندی ئٹ دشمن آ جلہو کننگ آ ہم خننگ مریرہ۔
منہ منٹ ئٹ بی ایل ایف نا سرمچارک راکٹ لانچر و A-1 گولہ تون اوار ایلو بھلا سلاہ تیٹ لشکری کیمپ ئنا سیکیورٹی پوسٹ آتِہ تباہ کیرہ و کیمپ ئنا خڑک رسینگرہ۔
ویڈیو ٹی اسہ بلوچ جنگجو ئس لشکر تون مون پہ مون جنگ کرِسہ شہید مننگ آ ہم خننگ مریک، و ایلو سنگتاک تینا شہید سنگت نا جون ئے جنگ ئنا پِڑ آن دیرہ۔ اندن سرمچارآتا اسہ ٹولی ئس دژمن تون جنگ ئٹ آختہ خننگ مریک۔
ویڈیو نا ایسر ئٹ اِرا گاڑی ٹی سوار سرمچارک بی ایل ایف و بلوچستان نا بیرک ئے ہرفینو و بازار نا خڑک آن گدرینگ ءُ و لس مخلوق تینا راجی لشکر ئے بخیر کننگ آ خننگ مریک۔
