سندھودیش روولیوشنری آرمی (ایس آر اے) نا چیف کمانڈر سید اصغر شاہ، رہبرِ سندھ، سائین جی ایم سید نا 121 میکو سالگرہ نا وختا تینا کلہو ئسے ٹی پارے کہ دیہاڑی شخصیات آک راج آتِہ آجوئی و خوشحالی نا کسر آ روان کننگ کن نظریات و فلسفہ تخلیق کیرہ۔ ہرانا سوب آن راج آک اوفتِہ ساندہ یات تخرہ۔
او پارے کہ بیستمیکو کرن ئٹ او سندھو دیش ئنا دیہاڑی فکر و فلسفہ ئے پیش کرے، ہراڑان نہ بیرہ سندھی راج تینا زبان، وطن، دیہاڑ و دود ربیدہ غان واخب مس بلکہ او تینٹ ہم فکر ئٹ ہمالیہ نا وڑ بُڑز مس و ایسری دم اسکان جہد ئے برجاء تخا۔ ہرانا نظریہ اینو اسکان ہم ننا رہنمائی ئے کننگ ئٹی ءِ۔
سید اصغر شاہ پاکستانی ریاست نا 77 سالی آ پالیسی تیا نغد کاری کرے و پارے کہ سندھ بد انگا حالیت تون مون تسنے۔ سندھ ئنا وجود ئے ہِس کننگ کن بیم بش کروکو فیصلہ کننگ مننگ ءِ۔ “گرین پاکستان انیشیٹو “ و “ کارپوریٹ فارمنگ “ کون آ ڈٹ بندی تا ذریعت ئٹ سندھ ئنا سرزمین ئے ساندہ تباہ کننگ نا کوشست کننگانے۔ پنجاب سامراج دریائے سندھ آن 6 کینال کشسہ تینا خشکاوہ غا زمین تہ خرن کننگ ءِ وخت ئسکہ سندھ ئنا آباد انگا زمین تِہ ویران کننگ نا سازش ئٹی ءِ۔ کارپوریٹ فارمنگ نا ذریعت ئٹ فوج سندھ ئنا لکھ آتا ایکڑ زمین آ کوزہ کننگ خواہنگ ءِ۔
او پارے کہ سائین جی ایم سید ساندہ پارینے کہ، “سندھ و پاکستانی ساندہ تینا مخالف مسُنو“ اگہ پاکستان مس تو سندھ تباہ مریک۔ ” سندھ ئنا بقاء کن پاکستان نا فنا ضروری ئے۔ او پارے کہ او پک کرے کہ پاکستان نا فنا ایمنی ئٹ مفک ہراڑکن اسہ بے رحمو جنگ ئس ضرورت ءِ۔ ننے بیدس بے اومیتی و خلیس آن جنگ کروئی ءِ و کَھٹوئی ءِ تانکہ نن تینا وطن و راجی آجوئی ءِ سلامت تخنگ کین۔
آخر ئٹ سید اصغر شاہ، سائین جی ایم سید نا سالگرہ نا موقع غا اونا فکر ئتو وفاداری نا وادہ ئے کرِسہ اونا نظریہ ئے دروت ندر کرے۔ او تیوہ غا انسانیت و سندھی تِہ جی ایم سید نا سالگرہ نا مبارکی ئے تس۔
