بلوچ نیشنل موومنٹ (بی این ایم) نا بندغی حق آتا ادارہ، "پانک” تینا دسمبر 2024 نا رپورٹ ئے شنگ کرینے ہراٹی بلوچستان ئٹ برجاء بندغی حق آتا لتاڑ نا شابیت حوال اوار ءِ۔
رپورٹ نا رد ئٹ، پاکستانی لشکر دسمبر 2024 ئٹ 22 بندغ زوراکی ئٹ بیگواہ و پنچ بندغ بیدس عدالت کھسفینے۔
رپورٹ ئٹی پاننگانے کہ زوراکی نا بیگواہیک شش ضلع ٹی رپورٹ مسنو، ہرافتیٹی کیچ ئٹی کُل آن زیات 10 بندغ، گوادر ئٹ 6، ڈیرہ بگٹی ٹی 2، خاران ئٹ 1، و حب آن 1 بندغ ئس پاکستانی لشکر و اوڑتون تفوک ادارہ غاک بے قانودی دزگیر کننگ آن گڈ بیگواہ کرینو۔
پانک ئنا رپورٹ ئٹ پاننگانے کہ زوراکی نا بیگواہی تا اسل کچ داکان زیات ہم مننگ کیک انتئے کہ بھاز آ خاہوت آک خلیس نا سوب آن ہیت کپسہ۔ زوراکی نا بیگواہیک خاہوت آتا نفسیاتی ناجوڑی تا سوب جوڑ مسنو، و انصاف یا ریاستی احتساب نا ہچو کسر اف۔
رپورٹ نا رد ئٹ پاکستانی لشکر پنچ بندغ بیدس عدالت خون کرینے۔ کیچ ئٹ نوید حمید و ظریف عمر بیدس عدالت کھسفنگار و پاکستانی لشکر ڈرون جلہو کرِسہ پنجگور ئٹ عبدالحمید، ذاکر و دل جان ئے کھسفے۔
پانک بندغی حق آتا لتاڑ ئے توننگ کن دمدستی جہانی مداخلت نا خواست کرینے۔
