مشکے ٹی سلاہ بند بندغ آک پاکستانی لشکر و کسر جوڑ کروک کمپنی آ کاریم کروک آ ایف ڈبلیو نا کارندہ غا تہ مُسہ جتاؤ جاگہ غا جلہو ئٹی ٹک کریر۔
حوال تا رد ئٹ سلاہ بند بندغ آک اینو سہب ئنا مشکے نا ہند بنڈکی ٹی پاکستانی لشکر نا چوکی ئے ٹک کریر اوکان پد سلاہ بند بندغ آک گزی ٹی پاکستانی لشکر نا پیکٹ آ سلوک لشکری کارندہ غا تہ ٹک کریر ہرانا سوب آن پاکستانی لشکر ئے سخت جانی نسخان ہرفوئی تما۔
جہی حوال تا رد ئٹ سلاہ بند بندغ آک ہندا وخت تعمیراتی کمپنی ایف ڈبلیو نا کارندہ غا تہ جلہو ئٹی ٹک کریر۔
جلہو نا وخت ہند ئٹی سخت سُمکاری نا توار بننگ مس ہراکان گڈ ہندن گمان ءِ کہ پاکستانی لشکر ئے بھاز جانی نسخان مسنے۔
جلہو تیان پد ہیلی کاپٹر آک ہم پن کروک جلہو جاگہ غا ہرے اسکان گشت کریر و پدا لشکری کارندہ غا تا جون و ٹپی آ تہ آواران ہیڈکوارٹر نا پارہ غا دننگا۔
واہم دا بابت ئٹ کالخواہ تا ہچو درشان ئس مونا بتنے و نئے کہ جلہو تا زمہ واری ئے تنظیم ئس ہرفینے۔
