بلوچستان لبریشن فرنٹ نا جارکش میجر گہرام بلوچ میڈیا ٹی شنگ کروک تینا اِرا درشان ئٹی کیچ ئنا علاقہ تربت نا ہند آپسر و تمپ ئٹ جلہو تا ذمہ واری ئے ہرفے۔
جارکش پارے کہ سرمچارک 12 جنوری یک شمبے نا دے آپسر بلوچ بازار تربت ئٹ ساڑی کوزہ گیر پاکستانی لشکری کیمپ آ گرنیڈ لانچر تیٹ کیہی گولہ خسار ہرانا سوب آن کوزہ گیر لشکر ئے جانی و مالی نسخان تون مون تروئی تما۔
او پارے کہ جلہو آن پد کوزہ گیر لشکر نا کارندہ غاک حواس باختگی نا درشانی کرِسہ سمکاری کریر ولے بلوچ سرمچارک گچین آ گوریلہ و جنگی حکمت عملی تیٹ ہمو جہہ آن سرسلامت تینا رکھوک ٹھکانہ غا تیا ہنار۔
میجر گہرام ودیک پارے کہ بی ایل ایف نہ بیرہ دیہات آ تیٹ بلکن بلوچستان نا اہم انگا شار تیٹ گوریلہ حکمت عملی نا رد ئٹ کوزہ گیر لشکر ئے ٹک کرِسہ نفسیاتی ناجوڑی تا گواچی کننگ ءِ۔ ہرانا سوب آن سرگڑدان آ دشمن لشکر نا کارندہ غاک الس ئے دروغ ئنا مونتس تیٹ خلیرہ یا اوفتِہ زورانسری بیگواہی تا گواچی کیرہ ہرا اوفتا فطرت ءِ و دا اوفتا خلیس و باتِس نا پیدواری ءِ۔
اندن اسہ پین شنگ کروک بیان ئسیٹی بی ایل ایف نا جارکش میجر گہرام بلوچ پارے کہ سرمچارک دوانزدہ جنوری آ ویگہ نا ہفت و نیم بجہ غا کیچ ئنا ہند تمپ ئٹی کوزہ گیر پاکستانی لشکر نا کیمپ آ جلہو کریر۔
او پارے کہ جلہو ئٹی سرمچارک بھلا سلاہ تہ کارمرز کرسا دشمن لشکر نا تمپ کلات سر ئٹ اسہ مورچہ ئسے ٹک کریر، ہراٹی دشمن ئے جانی و مالی نسخان ہرفوئی تما۔
اونا پاننگ اس کہ بلوچستان لبریشن فرنٹ پوسکن انگا جنگی حکمت عملی تیا عمل کرسا کوزہ گیر پاکستانی لشکر نا برخلاف تینا کاروائی تہ موثر و منظم کننگ ءِ۔ سرمچارک پوسکن آ ٹیکنالوجی، گوریلہ جنگی اصول و اسٹریٹجک پلاننگ ئے کارمرز کرسا دشمن نا ہن ئہ بر ئے محدود و اونا حال حوالی بست و بند ئے شَل کننگ ءُ۔ دا حکمت عملی دشمن نا صف تیٹی خُلیس ودی کننگ تون اواع ننا مزاحمت ئے سوگو و گیش نتیجہ خیز جوڑ کیک۔
میجر گہرام ایسر ئٹ پارے کہ بلوچستان لبریشن فرنٹ دا جلہو نا زمہ واری ئے ہرفک و سرزمین نا آجوئی اسکان جلہو تِہ برجاء تخو۔
