بلوچستان نا صنعتی شار حب چوکی ٹی بیگواہ کننگوک بندغ آتا خاہوت آتا پارہ غان مُسہ دیئی بین برانزی کیمپ اینو ایسر مس۔ کیمپ ئنا گُڈیکو دے خاہوت آک حب پریس کلب آن اسہ برانزی ریلی ئس کشار ہرا شار ئنا جتا کسر تیان مرسا دوارہ پریس کلب نا مونا برسا ایسر مس۔
دا بین برانزی کیمپ زوراکی ئٹ بیگواہ کننگوک اِرا ایلم، جنید حمید و یاسر حمید نا خاہوت آتا پارہ غان خلنگاسس، ہرا خدو اکتوبر ئٹی حب چوکی و قلات آن پاکستانی لشکر نا دو آن زوراکی ئٹ بیگواہ کننگاسر۔
کیمپ ئٹ ایلو بیگواہ کننگوک بندغ آتا خاہوت آتیان بیدس بلوچ یکجہتی کمیٹی نا باسک آک، سیاسی باسک، و شاریک ہم اوار مسر۔
کیمپ ئٹ اوار ایلو بیگواہ کننگوک بندغ آتا خاہوت آتیٹ راشد حسین نا لمّہ، بی ایس او آزاد نا خوانندہ سروک شبیر بلوچ نا ایڑ سیماء بلوچ، بیگواہ چاکر خان بگٹی و نوروز اسلام نا خاہوت و نصیر جان نا لمّہ تون اوار پنجگور نا جہی ظہیر بلوچ نا خاہوت نا بندغ آک اوار اسر۔
بیگواہ کننگوک بندغ آتا خاہوت آک برانزی تتون تران کریر، اندن بلوچ یکجہتی کمیٹی حب و کراچی آن بروکا باسک آک ہم برانزی تتون تران کریر۔ تران کروکا زوراکی نا بیگواہی تِہ بند کننگ و بیگواہ کننگوک بندغ آتا آجوئی نا خواست کریر۔
