ضلع کیچ ئنا بنجائی شار تربت آپسر کولوائی بازار نا جہی فدا ولد داد نا خاہوت تربت پریس کلب ئٹ پریس کانفرنس کرِسہ پارینے کہ فدا ولی داد ئے 9 جنوری نا شام پاکستانی لشکر اُراغا چھاپہ نا وخت آ دزگیر کرِسہ بیگواہ کرے، نہ ننے اونا ڈوہ ئے پاننگ ءُ و نئے اونا بابت ئٹ معلومداری تننگ ءُ۔
او پاریر کہ فدا ولی داد مزور ئس مسنے، او دبئی ئٹ کیہی وخت اسکان مزوری آن پد مسہ تو مُست چھٹی تیا تینا اُراغا بسنے۔ داڑے ہم او بے ضروری آ کاریم یا سیاست ئٹ اوار متنے نہ وختس اُراغان بے فائدہ پیشتمانے۔ او اسہ خواری کشوکو و تینا کاریم تون کاریم تخوکو ورنا ئس ءِ۔
او پاریر کہ اگہ فدا ولی داد قانود نا نظر ئٹ ڈوہدار ئس ءِ یا لشکر ئے اونا بابت ئٹ خبر ارے ہرا قانود نا برخلاف مرے، گڑا ننا خواست ءِ کہ دہن بے قانودی زوراکی ئٹ بیگواہی نا جاگہ غا اودے عدالت ئٹ ہتنگ مرے و اونا ڈوہ تِہ پاننگِہ تانکہ قانود اودے ڈوہ ثابت کرِسہ آئین نا رد ئٹ سزا تے۔
او پاریر کہ او دا بے قانودی عمل نا برخلاف برانز نا کسر ئے ہلِسہ پرایمن وڑ ئٹ تینا برانز ئے ریکارڈ کریفور۔
پدا زالبول تا بھلو کچ ئس شہید فدا چوک آ برانز کرِسہ نعرہ خلکر و فدا ولی داد نا آجوئی نا خواست کریر۔
