تربت ئٹ جند ندر جلہو ئٹ پاکستانی لشکر نا مرگ ئنا گواچی و ٹپی مروک کارندہ غاتِہ ملٹری اسپتال آ دننگانے۔
ڈسٹرکٹ ہیڈکوارٹر اسپتال تربت نا میڈیکل سپر انٹنڈنٹ ڈاکٹر احمد بلوچ فون آ بی بی سی ئے پارینے کہ اسپتال ئٹ بمب جلہو ئٹ کھئوک اسہ ہم بندغ ئسے نا جون ہتنگتنے۔ اونا پاننگ اسک کہ اسپتال ئٹ تراک ئٹ ٹپی مروک بیرہ یانزدہ بندغ جانجوڑی کمک کن ہیسنو۔
او پارے کہ دا ٹپی مروکا تیٹ “ایس ایس پی سیریس کرائمز انویسٹیگیشن ونگ کوئٹہ” زوہیب محسن، اونا ایلم، چھار چنا و ڈرائیور اوار اسر۔
ہندی حوالکار تا رد ئٹ ٹپی و کھئوکا کارندہ غا تِہ تربت ایف سی ہیڈکوارٹر آ درینو۔
خن ئٹ خنوک شاہد آتا پاننگ ءِ کہ تراک آن پد سکیورٹی لشکر تیبہ علاقہ ئے گھیرہ ئٹ کرے، اندن ایمبولینس آ تون اوار ایلو گاڑی تا ہن ئہ بر برجاء ءِ۔
خیال ئٹ مرے کہ درو ویگہ نا تربت شار آن ہشت کلومیٹر نا مُری آ بہمن نا ہند آ پاکستانی لشکر نا کارندہ غا تِہ کاروان نا دروشم ئٹ دروکا بس ئے "جند ندر” جلہو ئسیٹ ٹک کننگا۔
ٹک کننگوک بس تیبہ بھس مسنے۔ اندن تراک ئٹ سیکیورٹی تروکا کارندہ غا تِہ ہم نسخان رسینگانے۔
جلہو نا ذمہ واری ئے بی ایل اے ہرفِسہ پارینے کہ دا جلہو ئے تنظیم نا مجید برگیڈ کرینے۔
