بلوچستان نا ضلع کیچ ئٹی اِرا جاگہ غا بلوچ زنک کشی و زوراکی نا بیگواہی تا برخلاف برانز برجاء ءِ۔
ضلع کیچ ئنا بنجائی شار تربت ئٹی ظریف عمر و نوید حمید ئے بےقانودی کھسفنگ نا برخلاف و انصاف کن خاہوت آک برانز کننگ ءُ۔
ایلو پارہ غان زمان جان و ابوالحسن نا آجوئی کن ہوشاپ ئٹی سی پیک کسر آ خاہوت آتا برانز برجاء ءِ، و کسر ہن ئہ بر کن بند ءِ۔
تربت ئٹی شہید فدا چوک آ تدوکا پنچ دے آن تمپ ئٹی پاکستانی لشکر نا دو آن بےقانودی خلنگ مروک ظریف عمر و بلیدہ ٹی خلنگ مروک نوید حمید نا خاہوت و بلوچ یکجہتی کمیٹی نا برانزی گدان برجاء ءِ۔
برانزیک شہید فدا چوک ئے چھار کنڈ آن اُلاخ آتا ہن ئہ بر کن بند کرینو۔
ہندا وڑ زمان جان و ابوالحسن کن ہوشاپ زیروپوائنٹ آ سی پیک کسرئے چھار دے آن بند کننگانے۔ چُنا نیاڑیک کسر ئے بند کرسا و ہڑاند تخیسہ اُلاخ آتا ہن ئہ بر کن بند کرینو۔
اوفک زمان جان و ابوالحسن نا آجوئی کن برانز کننگ ءُ و اوفتا آجوئی ئسکان کسر ئے بند کننگ نا پڑو کرینو۔
خیال ئٹ مرے کہ زمان جان و ابوالحسن ئے 16 دسمبر 2024 آ تربت آن بیگواہ کننگاسس واہم سی ٹی ڈی نا ذریعت ئٹ اوفتا دزگیری ئے درو قلعہ عبداللہ آن پاش کننگانے و اوفتیا سلاہ بند تنظیم تیتون سیالی نا دوبہ ہم خلگانے۔
ولے خاہوت نا پارہ غان پاننگانے کہ دا دروغو دوبہ ءُ و اوفتا بندغ آتِہ آجو کننگِہ۔
