سلاہ بند تنظیم تون تعلقداری ئے گھنڈِسہ سی ٹی ڈی بیگواہ کننگوک زمان جان و ابوالحسن نا دزگیری ئے قلعہ عبداللہ آن پھاش کرے۔
کاؤنٹر ٹیررازم ڈیپارٹمنٹ سی ٹی ڈی تربت آن بیگواہ کننگوک زمان جان و ابوالحسن نا قلعہ عبداللہ توبہ اچکزئی کراس آن دزگیری ئے پھاش کرینے و اوفتا بلوچستان لبریشن فرنٹ تون تعلقداری نا دوبہ خلِسہ تخریب کار ہنیڈ گرنیڈ خننگ نا دعوی کرینے۔
ایف آئی آر نا رد ئٹ 1 جنوری آ خاص مخبر ئسے نا خبر تننگ آ سی ٹی ڈی زمان جان و ابوالحسن ئے توبہ اچکزئی کراس ضلع قلعہ عبداللہ آن اسہ موٹر آ تولوک تورے و دا تومکا تیان ارا ہینڈ گرنیڈ تون اوار پین مواد برآمد کرے۔
زمان جان و ابوالحسن نا تعلقداری ضلع کیچ ئنا جہہ بالگتر آن ءِ و اوفتا زوراکی ئٹ بیگواہی نا دوبہ ئے اوفتا خاہوت ڈسٹرکٹ کونسل کیچ ئنا چیئرمین آ خلکسس۔
خاہوت نا رد ئٹ دا تومکا تیان بیدس الطاف پنیئو ورنا ئسے ہم ڈسٹرکٹ کونسل کیچ ئنا چیئرمین تینا اُراغا خواہفنگ آن پد پاکستانی لشکر نا دوٹی تسس ولے ارا دے آن پد الطاف ئے آجو کننگاسس۔
یاتی مرے کہ 16 دسمبر 2024 آ زمان جان ولد سپاحان، عبدالحسن ولد رحمت و الطاف ولد بہرام ئے زوراکی ئٹ بیگواہی نا گواچی کننگاسس و ارا دے آن پد الطاف ئے آجو کننگاسس۔
خاہوت نا پاننگ اسک کہ نن 20 دسمبر آ اسہ پریس کانفرنس ئس کریسن کہ ڈسٹرکٹ کونسل چئیرمن میر ہوتمان ننا بندغ آتِہ تینا اُرا غا خواہفنگ آن پد زوراکی ئٹ بیگواہ کرینے۔
زمان جان و ابوالحسن نا آجوئی کن اوفتا خاہوت تدوکا شام ہوشاپ زیرو پوائنٹ آ سی پیک کسر ہے بند کریسس۔
