کیچ آن پاکستانی لشکر نا دو آن زوراکی ئٹ بیگواہ کننگوک زمان جان و ابولحسن بلوچ نا خاہوت پارینے کہ حکومت و انتظامیہ نا باور تننگ آن ویتہ زمان جان و ابولحسن بلوچ ئے دائسکان آجو کننگتنے۔ سی پیک کسر ہوشاپ نا ہند آ بے چاننگوک وخت اسکان بند مرو۔
زمان جان و ابولحسن بلوچ نا خاہوت پارینے کہ دا تومکا تِہ ڈسٹرکٹ کونسل کیچ ئنا چیئرمین ہوتمان بلوچ تینا اُراغا خواہفنگ آن پد زوراکی ئٹ بیگواہ کریسس ہرانا برخلاف نن سی پیک کسر ئے ہوشاپ نا ہند آ بند کرِسہ برانز کرین۔
برانز نا جہہ آ انتظامیہ و حکومتی نمائندہ غاک و مزاکرات ئٹ ہم باور تننگاسس کہ اِرا دے ئنا تہٹی زمان و ابولحسن بلوچ ئے آجو کننگو، ولے اینو پنچ دے گدرینگ آن پد ہم اوفتِہ دائسکان آجو کننگتنے و نئے کہ ننے پاننگانے کہ او داوخت ارانگا و دِنا قیذ ئٹی ءُ۔
او پاریر کہ ضلعی انتظامیہ و حکومت ننے اسہ وڑ دروغ، بہانہ و جتا وڑ ئٹ فریشان کننگ ءِ۔ نن سی پیک آن تینا برانز ئے ہندا سوب آن ایسر کریسن کہ اِرا دے ئٹی ننا بندغ آتِہ آجو کننگو ولے حکومت تروکا وخت آ زمان و ابولحسن ئے آجو کننگ ئٹ بےسوب مسنے ہندا سوب آن اینو نن اسہ وار ولدا سی پیک کسر ئے بند کرِسہ برانز کننگ اُن۔
او پاریر کہ اینو شام اسکان اوفتِہ آجو کننگتو گڑا ہوشاپ نا جہہ آن سی پیک کسر وے پک مروک وخت اسکان بند کرون۔
