بلوچستان لبریشن فرنٹ نا جارکش میجر گْوہرام بلوچ تینا درشان ئٹی پارے کہ سرمچارک آواران و کیچ ئٹی کوزہ گیر پاکستانی فوج آ جلہو کریر ہراڑے کم آن کم دشمن نا ہشت کارندہ مرگ ئنا گواچی و کیہیک ٹھپی مسّنو۔
بی ایل ایف نا جارکش نا پاننگ اس کہ دسمبر نا سِی تاریخ آ دو بجہ آ بینٹ راہی شم آواران ئٹی سرمچارک مہالو آن چاری مرسہ پاکستانی فوج ئنا قافلہ آ پوسکنا و خودکار سِلاہ تیٹ بھلو جلہو ئس کریر، جلہو ہنداخس زوراک اس کہ دشمن فوج سُرنگ کتّو و اونا پنچ کارندہ جاگہ آ خلّنگار و بھازاک ٹھپی مسّر۔
او پارے کہ دا قافلہ لشکرکشی نا حوالہ ئٹ مَشی آ علاقہ آتیٹ پیہنگ ئٹی اس کہ انٹلیجنس دستہ نا حوال آ بی ایل ایف نا بھاز آ دستہ آک اوار مرسہ اوڑا بھلو جلہو ئس کریر۔
اونا پاننگ اس کہ دا جلہو آن پد کندھار دپ ئنا ہند آ کوزہ گیر فوج سرمچار تِہ پلویڑ کننگ نا کوشست کرے، سرمچارک اونا پلویڑ ئے پرغنگ کن دشمن تون گچین جنگ تسّر ہراڑے دشمن نا پین مُسہ کارندہ کھسکُر و بھاز آک ٹھپی مسّر و بھازا کارندہ آک جنگ ئنا پِڑ ئے الّیسہ نرّار۔
میجر گْوہرام مُستی پارے کہ اسہ پین جلہو ئسیٹ سرمچارک بیست و ہشت دسمبر آ نن ئنا ہشت ئہ نیم آ آپسر تربت ئٹی پاکستانی فوج ئنا بنجائی کیمپ ئے بھلا و جندکار سِلاتیٹ ٹِک کریر۔ جلہو ئٹی دشمن فوج ئے جانی و مالی نسخان رسینگا۔
او ودیک پارے کہ بی ایل ایف ساڑی آ وخت ئنا جنگی آ وڑ ئہ ڈول ئنا حساب آ تینا حکمت عملی ئے مہکم و پوسکن کرینے۔ دا حکمت عملی ٹی تنظیم نا انٹیلجنس دستہ، اسنائپر ٹیکٹیکل دستہ و قربان یونٹ ہر محاذ آ سلوک ءُ و دشمن ئے ہندنو دھک خَلیرہ کہ ہرافک دشمن نا گمان ئٹی افس۔ بروکا وخت ئٹی پاکستانی فوج و اونا بھلا جاگہ آتا سوگوی ئٹ جلہو کننگو ہراڑان دشمن نا زور ئے پرغسہ مکست دُوئی کننگو۔
گُڈی ٹی میجر گْوہرام بلوچ پارے کہ آواران جلہو نا ویڈیو ئے زوت میڈیا آ شنگ کننگو، ہراڑے کوزہ گیر فوج ئنا کھئوکا و ٹھپی آ کارندہ آک پھاش خننگرہ۔
بی ایل ایف دا جلہو آتا زمہ واری ئے منّک و بلوچستان نا آجوئی اسکان کوزہ گیر فوج آ جلہوک برجاء مرور۔
