زوراکی ئٹ بیگواہ کننگوک صحافی زبیر بلوچ آجو مس۔ برانز جہہ آن پولیس و سکیورٹی لشکر نا کریک ڈاؤن نا وختا بیگواہ کننگوک جمال بلوچ نا آجوئی ئسکان برانز برجاء مرو۔
شابیتی حوال تا رد ئٹ درو ننکان بلوچستان نا صنعتی شار حب چوکی آن زوراکی ئٹ بیگواہ کننگوک صحافی و خوانندہ زبیر بلوچ آجو مسنے۔ اونا آجوئی ئے اونا خاہوت نا پارہ غان پک کننگانے۔
خیال ئٹ مرے کہ زبیر بلوچ ئے درو ننکان حب چوکی ٹی دارو ہوٹل نا خُڑک اونا اُراغان پاکستانی لشکر دزگیر کننگ آن گڈ بیگواہ کریسس۔
اونا آجوئی کن اونا خاہوت و بلوچ یکجہتی کمیٹی نا کنڈ آن حب چوکی ٹی برانز بناء کننگاسس و کیچ ئٹی سی پیک کسر آ ہم تولوک برانز برجاء اس۔
حب چوکی ٹی برانز نا وختا پولیس نا کنڈ آن برانزی تیا کریک ڈاؤن و بیدادی نا تدینی مونا بسس و برانز نا جہہ آن جمال بلوچ پنیئو اسہ ورناس دزگیر کننگاسس ہرا نا ہچ ڈس اف۔
بی وائے سی نا کنڈ آن پاننگانے کہ حب ئنا بنجائی کسر آ برانز ہموتم ئسکان برجاء مرو ایسکان کہ جمال بلوچ سرسلامت آجو متنے۔
