درو پاکستانی لشکر نا دو آن بیدادی آن گڈ شہید مروکا ظریف بلوچ نا خاہوت تربت برانز ئنا جہہ آن پریس کانفرنس کرسا پارے کہ نن بلوچ راجی دیہاڑ نا ہندنو جاگہ ئسے آ سلوک اُن کہ ہراڑے تینا بندغ آتا جون تِہ ہرفنگ اُن ولے پُڑس ئنا دود ئے اِلانن۔ ننا دود ربیدئی پُڑس ئنا دود ننے آن پُھلنگ مسُنے انتئے کہ نن بیرہ سوال کننگ اُن۔
او پارے کہ نُم قلم نا وارث آک اُرے نُمے آن خواست ءِ کہ لکھبو بلوچ آک داسا جون تیا پُڑس کپسہ تینا بندغ آتا خلنگ مننگ آ سوال کیرہ و انصاف خواہیرہ۔
او پاریر کہ جمعہ نا شام ننا اُرا تمپ ئٹ ایف سی نا کارندہ غاک چھاپہ خلکُر و ظریف بلوچ ئے زوراکی ئٹ بیگواہ کریر۔ ایلو دے اونا جشوک جون ئے ویران ئسیٹی بٹیر وختس نن اونا جون ئے پوسٹ مارٹم کن تربت آ دننگ اسنُ گُڑا ایف سی کرفیو خلِسہ کُل کسرتِہ بند کرے۔
خاہوت نا رد ئٹ ننے کیہی گھنٹہ ئسکان توننگا، ننا میت ئے تابوت ئسکان سر مننگ آن توننگ مس و بیوس مرسا ایسر ئٹ ننے تینا ُچنا ئے گُڈی ہند کروئی تما و اینو نن تینا قانودی حق کن برانز کننگ اُن۔
پریس کانفرنس ئٹی خاہوت نا پاننگ اسک کہ نن دا پھاش پانہ کہ نن پاکستانی راہبند و قانود نا رد ئٹ تینا حق آتا خواستکار اُن، ولے ایف سی کارندہ غاتا نہاری ہندا سوب آن ننا برخلاف برجاء ءِ انتئے کہ او تینے قانود آن بھلن سرپند مریرہ۔ ہرا قانود تاغتور ئے پین تاغتور و کمزورئے پین کمزور جوڑ کننگ ءِ۔
او پارے کہ ظریف بلوچ نا جون ئنا ٹپ آک فوج ئنا زوراکی تا کسہ غا تِہ درشان کریرہ۔ اونا بدن ئے داغ تننگاسس، دُو تِہ تڑنگاسس و اوڑا بیدادی نا پھاش نشانک اسُر نن سوچنگ کپنہ کہ ارا اذیت ئٹ اوڑان اونا زند ئے پلنگانے دا درد ننے تیبہ غا زند خاچنگ کن الیپرو۔ دا ٹپ آک ننے فوج ئنا سفاکیت آن نفرت ہیل تیرہ و دا فوج ہرا وردی ٹی ءُ بندغ افس بلکہ بندغی دروشم ئٹ نہار ءُ۔ ننا راج ہر اُرا ئسکان کلہو سر کبو کہ ننن انصاف خواہنہ۔
خاہوت پارے کہ نن ہموتم ئسکان برانز کرون ہراتم ئسکان ایف سی کارندہ غاتا برخلاف قانودی کاروائی مفک۔ ننا برانز بھلن مرو پگھہ تربت ئٹی پہیہ جام و شٹرڈاؤن ہڑتال نا کال تینہ و تینا راج آن خواست کینہ کہ دا برانز ئے سرسوب کننگ ئٹی تینا کڑد ئے سر تیر۔
