کوئٹہ پریس کلب نا مونا زوراکی نا بیگواہی تا برخلاف برانزی کیمپ ئے اینو 5682 دے مس۔
دا وختا بیگواہ کننگوک گل محمد مری نا خاہوت نا پاننگ اس کہ غلام نبی نا مار گل محمد مری ئے برجاء غا تُو ئنا 20 تاریخ آ پاکستانی لشکر ہرنائی آن ہموتم دزگیر کننگ آن گڈ بیگواہ کرے ہراتم او ہرنائی شار ئٹ جمعہ نا نماز خواننگ آن گڈ تینا اُرا محلہ برگو آ ہِننگ اس۔
عمران مری و سفر خان مری نا خاہوت آک تنظیم تون غاو کریر کہ محلہ سنٹلی ہرنائی نا جہی محمد نور نا مار عمران مری و محلہ کوریاک ہرنائی نا جہی محمد نور نا مار سفر خان ئے پاکستانی لشکر دکی شار آن برجاء سال 30 نومبر آ زوراکی ئٹ بیگواہ کرے۔
اندن محلہ کوریاک ہرنائی نا جہی محمد نور نا مار شیر محمد مری ئے ڈھکوک ادارہ غا تا کارندہ غاک پیر صاحب ایف سی چیک پوسٹ ہرنائی آن ویتہ قانود دزگیر کننگ آن گڈ بیگواہ کرینو۔
ہر چھار زوراکی ئٹ بیگواہ کننگوک بندغ آتا خاہوت آک دا ہم غاو کرینو کہ انتظامیہ اوفتِہ اوفتا بندغ آتا بارو ئٹ حوال ہم تننگ اف۔
تنظیمی تیبر آ خوہوت آتِہ باور تننگانے کہ گل محمد مری، عمران مری، سفر خان مری و شیر محمد مری نا کیس آتِہ حکومت و بیگواہ کننگوک بندغ آتیکن جوڑ کننگوک کمیشن ئے تننگ مرو و اوفتا سرسلامت آجوئی کن توار بُڑز کننگو۔
تنظیم نا چئرمین نصراللہ بلوچ حکومت آن خواست کرے کہ گل محمد مری، عمران مری، سفر خان مری و شیر محمد مری آ اگہ دوبہ ارے تو اوفتِہ پھاش کرسا عدالت آ ہتنگ مرے، اگہ او بےڈوہ مسر تو اوفتِہ دمدستی یلہ کننگِہ۔
