پاکستانی لشکر نا دو آن ظریف بلوچ ئے کھسفنگ نا برخلاف تربت ڈی بلوچ پوائنٹ آ سی پیک کسر بند کننگانے۔
ظریف بلوچ ئے کھسفنگ و جون ئے زوراکی ئٹ توننگ نا برخلاف نیاڑیک سی پیک کسر ئے ڈی بلوچ نا جہہ آ بند کرینو۔
برانز کروک نیاڑی تا رِد ئٹ مون نا شام ظریف ئے اُرا غان دزگیر کننگ آن پد اونا جون خاہوت ئے رسینگا، اوڑا بیدادی ہم کنگاسس۔ خاہوت وختس جون ئے تربت آ ہتنگ اسک تو اوفتِہ کسر آ توننگا و جون ئے تربت آ ہتنگ کِن الیتوس۔
اوفک پاریر کہ داکان زیات پین ظلم و زوراکی بلوچ تون اَنت ئس مننگ کیک کہ ننے تینا بندغ آتا جون تیا ماتم کننگ کن الیپسہ۔
گڈیکو حوال تا رِد ئٹ خاہوت ئے جون تون اوار آسیا آباد نا ہند آ لشکر جلّانے۔
ایلو کُنڈان لشکر نا زوراکی تا برخلاف شٹرڈاؤن برانز برجاء ءِ۔
تمپ ئنا علاقہ آسیا آباد آن ویڈیو کلوہ ئس شنگ کرسا ظریف نا مسِڑ نا رِد ئٹ کہ او تینا باوہ نا میت ئے تربت آ پوسٹ مارٹم کن ہتنگ خواہسکہ کہ اونا مرگ ئنا سوب چائنگ مرے، ولے لشکر نا کارندہ غاک اوفتِہ جلّانو، دا نا برخلاف اوفک برانز کرسا کسر ئے بند کریر۔ برانز ئٹی کیہی نیاڑیک اوار ءُ۔
یات مرے کہ ضلع کیچ ئنا تحصیل ئٹی پاکستانی لشکر اُرا تیا چھاپہ خلسہ ظریف پنیئو بندغ ئس بیگواہ کننگ آن پد اوڑا بیدادی کرسا کھسفے و اونا جون ئے خسا۔
