کولواہ: بلوچ وومن فارم نا کُنڈ آن شہید بانک کریمہ نا یات ئٹ مجلس ئس پنچ شمبے نا دے ڈنڈار ئٹی اڈ تننگا۔ مجلس ئٹی ڈنڈار و ہیب ئہ کھیب ئنا بندغاک بھلوو کچ ئسیٹ بخش ہلکُر۔
مجلس ئٹی بلوچ وومن فارم نا سروک ڈاکٹر شلی تران کرسا پارے کہ تمپ ئٹ بانک کریمہ آن بیدس باز بندغ ارے ولے نن ہندا سوب آن بانک کریمہ ئے یات کینہ کہ بانک کریمہ بلوچ ہمو مسِڑ مسنے ہرا تینا زَند ئنا کُل خواہش آتِہ الِسہ تینا زِند ئے بلوچ راج کِن ندر کرے۔
او مُستی پارے کہ نن داڑے تولوک بندغ آتِہ پاننگ خواہنہ کہ تینے بانک کریمہ تون اوار کبو۔ بانک ئے نہ بیرہ اسِہ دے ئس یات کبو بلکہ بانک ئے تینا خیال آتیٹی جاہ ترسا ہر وخت یات کبو۔ نن ہر گھام آ ہنِسہ کین و تینا راجی بامرد آتِہ یات کرسا اوفتا خنوک آ تُغ تِہ پورو کین۔
ڈاکٹر شلی پارے کہ دا جہد بیرہ کریمہ نا کوپہ غا تیا متنے، دا جہد نہ بیرہ یکہ ہمو بندغ آتا کوپہ غاتیاٹے ہرا جہد کِن پیشنگانو۔ دا اسِہ راجی جہد ئسے ننے کُل ئے اوار مروئی ءِ۔ ننے ہندا شان تروئی ءِ کہ نن داسہ غلام افن، ہرا تُغ ئے ننا شہید آک خننانو ننے پورو کروئی ءِ۔ نن داڑے تولوک بندغاک تینا زمہ واری تِہ پورو کین گڑا تینا مزل آ سر مرون، مزل آ سر مننگ کِن ننے تینا زاتی خواہش آک النگ خواہرہ۔
