بلوچستان نا صنعتی شار حب چوکی ٹی زوراکی ئٹ بیگواہ کننگوک بلوچ کارکن راشد حسین نا خاہوت نا کنڈ آن زوراکی ئٹ بیگواہی نا شش سال پورو مننگ و اونا وے آجو مننگ نا برخلاف برانزی ریلی کشنگا۔
راشد حسین بلوچ 2018 ئٹ متحدہ عرب امارات آن بیگواہ کننگاسس، شش سال آن زوراکی ئٹ بیگواہی نا گواچی ء۔
خاہوت نا رد ئٹ راشد حسین 2017 آن جلاوطنی اختیار کریسس و متحدہ عرب امارات ئٹ رہینگاکہ ہموکان اودے برمتہ کننگا و شش تو آن پد او متحدہ عرب امارات آن بیگواہ مس۔ اوکان پد اودے بیدس قانودی عمل یا دستاویز آن پاکستان نا حوالہ کننگا۔
اوفتا پاننگ ءِ کہ پاکستان آ ہتنگ آن پد راشد حسین دائسکان بیگواہ ءِ، اونا خاہوت سندھ ہائی کورٹ، بلوچستان ہائی کورٹ، اسلام آباد ہائی کورٹ و بیگواہ بندغ تا کمیشنز و کمیٹی تیٹ مقدمہ دائر کریر ولے دائسکان ورندی ملیتنے۔
راشد حسین نا زوراکی ئٹ بیگواہی نا شش سال پورو مننگ آ اسلام آباد ہائی کورٹ ئٹ راشد حسین نا وکیل و بندغی حق آتا باسک ایمان مزاری پارے کہ پاکستانی وزارت خارجہ منانے کہ راشد ئے پاکستان نا حوالہ کننگاسس، ولے حکومت و کالخواک اونا ساڑی مننگ یا اونا بابت ئٹ معلومداری تننگ افس۔
اینو برانز نا وخت آ راشد حسین نا لمہ تینا شش سال ئنا جہد نا ذکر کرسا پارے کہ ای شش سال آن تینا مارے پٹنگ ئٹی اُٹ، ولے کنے ہچ ورندی تننگ افس۔ کنا مار ئے بے قانودی وڑ ئٹ برمتہ کننگا، و ای ہر عدالت و کمیشن نا در آ ہناٹ ولے انصاف نا نظام کنا کمک کتو۔
ہموتم حب چوکی برانز ئٹ ایلو بیگواہ کننگوک بندغ تا خاہوت آک ہم اوار اسر۔ برانزیک شاری و سیاسی جماعت آتا سروک آک ہم اوار اسر۔
برانزیک راشد حسین بلوچ تون اوار بیگواہ بندغ آتا زوت آجوئی نا خواست کریر و پاریر کہ او انصاف ملنگ اسکان تینا جہد ئے برجاء تخور۔
برانزیک جہانی کہول و بندغی حق تا تنظیم تیان خواست کرینو کہ او بندغی المیہ غا زوت توجہ تیر و بیگواہ بندغ تا آجوئی کن گھام ارفیر۔
