نوشت: مہر دین بلوچ
۱۲ جنوری ۲۰۱۳ نا دے اسک۔ سم تا توار اس ولے چہیانٹ نا توار الو۔ انقلاب کن تینے نسوکا شہید ڈغار آ تموک اس۔ زندہ سلنگ کن مرگ ئے خمب کروکا عظیم انگا شہید نا مون آ مرگ ئنا خُلیس الو بلکہ مدام زندہ سلنگ نا جارات اسک۔ اونا جوڑ تیٹی بارُنو بشخندہ ئس اسک ہمو بشخندہ ہرا دا ڈغار کن ندر مروکا غٹ سپاہی تا گڈی ساعت آتیا اوفتا جوڑ تیا مریک۔ اونا خن تیٹی غلامی نا تہاری الو بلکہ بروکا آجوئی نا رژن اسک۔ اے دیر اس کہ مش بڑز آ پینگون آ جوزہ تون او مرگ ئتون ہم گھام مس او تینا ساہ ئے ننکن و ننا بروکا پگہ کن تسک۔ اے ہنینا دیدہ دیر ئس اسک۔ اے زرابی آ جوزہ تون غفار و سگار نا پدریچ یونس بلوچ اسک۔
شہید یونس 1974 آ منگچر نا شار کلی درکزہی ٹی ودی مس۔ پنچ سال نا وہی ٹی او سندھ ئنا علاقہ ٹھنڈو الیار آ خواننگ کن ہنا۔ ٹھنڈو الیار آن میٹرک کرے پدا تینا باوہ پیرئی خلق منگچر آ بس۔ ایف ایس سی منگچر آن کرے۔ دور ئنا ایلو چُنا تا وڈ اونا ہم خواننگ آ است الو او تینا باوہ تون زمینداری کریکہ۔ ولے انت کاریم ئس ہم کریکہ است ئٹ کریکہ۔ تینا کاریم تون مخلص اسک۔ دو ہزار نا اول آ اونا ڈپٹی پولیس ئٹ لگا۔
دنکہ یونس اسہ مہروانو بے کچ مخلصو ورناس اسک۔ اونا اندا مہروانی اودے راجی آجوئی نا جہد ئٹ بشخ ہلنگ نا پام تس۔ یونس بلوچ ۲۰۰۵ آن بلوچ قومی تحریک اٹ آوار مس۔ ارا سال اسکان او شاری گوریلا نا وڑ ئٹ کاریم کرے۔ وختس کہ او شار ئٹ اشتیاری مس گڑا او مش ئنا سخت و سور انگا زند ئنا دو ئے ہلک۔
دا کان اسہ مشی ساہ ءُ سرمچار ئسے نا پند و خواری تا کسہ بناء مریک۔امو داستان ہرا بدن ئٹ سلوکا دتر نا آخری پُڑی اسکان جہد ئنا سوگوی کن دڑد سگا۔ ہرا کہ روح ئنا دسک آتِہ دا ڈغار تون تفے۔ امو کہ دا گلزمین کن انا تینا ساہ ئےتس۔ تینا معصوم آ چُنا تِہ الا۔ تینا آسرات آ زند ئے الا۔
اوکان پد یونُس جان بولان و ناگاہو نا مش تیٹ تینا جنگ و جہد ئے برجاء تخا۔ گوریچ، باسُنی، ہتم،سہیل، آہڑ، ہر مُد ئٹ او تینا راجی جنگ کن، تینا قومی ٹیوار کن دور ئنا خدا تیتون جنگ تس۔سُم تا مونا تینا سینہ ئے پاش کرے۔ راج ئنا پگہ کن او تینا پگہ ئے استان درے۔ او خواہسکہ گڑا او اسہ جوانو زند ئس گدریفنگ کریکہ ولے او غلامی نا آسراتی آن آجوہی نا سختی تِہ اولیت تس۔
شہید یونس و اُونا ہمراک دشمن آ چندی جہلو تِہ کریر۔ جوہان، گزگ، ڈھلو و کوہ سیاہ آ او چندی دشمن تا خن تِہ سٹیفیر۔
سال 2013 اسکان جنوری نا 12 دیہاڑ اس کہ او منگچر آ تینا لمہ باوہ ئے خننگ کن بریک۔ پدا باوہ نا وار وار پاننگ آ او شام ئنا واپس تینا کیمپ آ ہننگ کن پیشتمک ولے کسری اُونا موٹرسئیکل پینچر مریک۔ شام ئنا سوب آن او مستی سفر کننگ کپک گڑا او تینا شار آ اسہ سنگت ئسے نا بیٹک آ خاچک۔ بخت ئنا تیان دیر ئے سما۔ یونُس جان سُہب ئنا سہار تون بش مریک تو سمک تمک کہ اُونا مخبری مسُنے۔ دشمن نا باز بھلو لشکر ئس اُونا کنڈ آ بننگ ئٹی مریک۔ او تینے کشنگ نا کوشست کیک ولے اُرک کہ باز ہُرے مسُنے گڑا او گڈیکو ساہ اسکان دشمن تون جنگ تننگ نا فیصلہ کیک۔ داکان فوج کُل مخلوق ئے اُرا تیان تا کشِسہ او الِسہ کیک۔اوکان یونس جان اسہ گشتی دستہ ئسے آ تا گرنیڈ ئس خسک۔ گرنیڈ نا تراخ تون دشمن ہبکہ مریک دانگ ہینگ نریک۔
انداڑے شہید یونُس دیوال آ جُپک ہیپار خسک تینے و ڈیم ئنا مش تا کنڈ آ اننگ آ مریک کہ انداڑے دشمن آ تا دستہ ئس مون آن خننگک و دوارہ جنگ بناء مریک۔ یونُس جان جوان جنگ ہیتک ئتون تا ولے اونا سُمک کُھٹیرہ۔ شہید یونُس ہیپار نا مش ئکن رمب کیک انداڑے داپار آن دشمن نا دستہ ئس خنک تہ و سم خلیک ئیان تہ۔ یونس جان انداڑے شہید مریک۔
دُنو ہزار آ مشمار ارے ہرا تینا گلزمین کن، تینا راجی آ شان ئکن، تینا راجی ٹیوار کن، تینا راجی آ شون ئکن تینا ساہ ئنا ہچ چُرت ئے خلپسہ۔ تینا ساہ ئے اتیرہ تا قیامت زندہ مننگ کن۔
