بلوچستان لبریشن فرنٹ نا جارکش میجر گہرام بلوچ میڈیا ٹی بیان ئس شنگ کرِسہ پارے کہ جھاؤ و کولواہ جلہو ئٹی پاکستانی لشکر نا اِرا کارندہ نا خلنگ و کیہی تِہ ٹپی کننگ نا ذمہ واری ئے ہرفِنہ۔
جارکش نا پاننگ اسک کہ سرمچارک 24 دسمبر 3 شمبے نا شام 4:30 بجہ غا کولواہ نا علاقہ دمب مالار ئٹی جوڑ مروک کوزہ گیر پاکستانی لشکر نا چوکی ئے پوسکن و بھلا سلاہ تیٹ ٹک کریر، ہرانا سوب آن کوزہ گیر پاکستانی لشکر ئے جانی و مالی نسخان مس۔
او پارے کہ اسہ پین کاروائی ئسیٹی سرمچارک 25 دسمبر نا شام 5:30 جھاؤ نا ہند کورک ئٹی پاکستانی لشکر نا پند آ ہنوک آ ٹولی تِہ پوسکن و بھلا سلاہ تیٹ ٹک کریر ہرانا سوب آن کوزہ گیر لشکر نا اِرا کارندہ خلنگا و بھازاک ٹپی مسُر وخت ئسکہ ہندا جلہو ئٹی ڈرون کیمرہ تِہ ہم ٹک کننگا۔
بیان ئٹی پاننگا کہ پاکستانی لشکر تدوک آ اِرا دے آن دا علاقہ ٹی زوراکی و لشکر کشی نا غڑض ئٹ ساڑی ءِ و کلین پری نا ہند آ اسہ عارضی ءُ کیمپ ئس جوڑ کرینے۔ ہراتم دا کارندہ غاک علاقہ ٹی لشکر کشی کننگ آن پد واپس کیمپ آ بننگ اسُر تو سرمچارک اوفتِہ ٹک کریر۔
اونا پاننگ اسک کہ تیوہ بلوچستان ئٹی کوزہ گیر ریاست تینا کوزہ ئے پین ساندہ کننگ کن جاگہ جاگہ غا کیمپ و چوکی جوڑ کرینے ہراڑے ہر بروکا دے آ بندغ آتِہ بیدادی نا گواچی کیک و بندغ آتِہ ہندا کیمپ آتا خواہِفسہ زورانسری بےگواہ کیک۔
او پارے ولے بی ایل ایف بلوچ راج ئنا تنظیم ءِ و تینا آجوئی نا مسخت کن سلوک پاکستانی لشکر و اونا تنصیب آتِہ ٹک کرِسہ اودے نفسیاتی و ذہنی شکست تننگ ءِ۔
جارکش ایسر ئٹی پارے کہ بلوچستان لبریشن فرنٹ دا جلہو تا ذمہ واری تِہ ہرفک، و کوزہ گیر لشکر نا تیبہ پیش تمنگ اسکان اودے ٹک کرسہ کیک۔
