بلوچ نیشنل موومنٹ (بی این ایم) نا بندغی حق آتا سیکریٹری ڈاکٹر ناظر نور بلوچ تینا درشان ئٹی آواران آن زوراکی ئٹ بیگواہ کننگوک بندغ آتان زورئٹ اکرار ہلّنگ اوفتہ بی ایل ایف تون گھنڈنگ آ افسوس کرسہ پارینے کہ جون 2024 ئٹی تیرتیج آواران آن کوزہ گیر پاکستانی لشکر دلجان/اللہ بخش ئے ہلسہ بیگواہ کرے ہراڑکن اونا خاہوت برانز کرسہ کسر ئے بند کرے۔ جلسہ و ہڑتال کننگا، تولوک برانز کننگا و نیٹ پن ئنا حکومت تون دلجان نا خاہوت ہندا اکرار تون برانز ئے پد تخا کہ زو ئس دلجان ئے پھاش کننگو ولے پاکستانی ریاست زوراکی ئٹ بیگواہی تا تینا ڈوہ ئے ڈھکنگ کن دلجان ئے بی ایل ایف نا پِنا مونا ہیس۔
او پارے کہ بندی کننگ و گیشتر بیدادی آن پد دلجان ئے اسہ دروغ ئنا نوشت ئس خوانفنگ نا ویڈیو ئے شنگ کننگانے۔ دا وڑ میڈیا ٹرائل کرسہ پاکستانی فوج کوزہ کروک بلوچستان ٹی آجوئی دوست بلوچ سِلاہ بند تنظیم آتا مونٹی تینا بےسوبی ئے ڈھکنگ خواہک۔ فوج ئنا دا وڑ ئنا چم آک اونا نفسیاتی و ذہنی باء تس (شکست) و چھچھرو مننگ ئے پھاش کیرہ۔ دا وڑ نا کاریمک اسَل ئٹ پاکستانی فوج ئنا بےسوبی و باء تس ئنا پھاشی ءُ۔
ہندن مشکے، تنک آن اپریل 2024 آ پاکستانی فوج ئنا دُو آن زورئٹ بیگواہ کننگوک حاصل/ محمد حسن ئے لٹ کُٹ آن پد ویڈیو ٹی بی ایل ایف تون گھنڈنگ نا کوشست کننگانے ہراڑان دا پھاش مریک کہ پاکستان تینا سزا جاہ تیٹ ورنا، پیرنگا و چنا تہ لٹ کُٹ آن پد آجوئی دوست بلوچ سلابند تنظیم آتون گھنڈسہ تینا ڈوہ تہ منّفنگ نا بےسوبو کوشست کیک تاکہ پنجاپ نا اُلس آن ہمدردی دوئی کننگ کے۔ بی ایل ایف ئے شون دشمن پھاش کرسہ اسَل ئٹ کوزہ گیر پاکستانی ریاست تینا لُٹ و پُل و شون دشمن کڑد ئے اندر کننگ خواہک ولے بلوچ راج پُہہ ءِ کہ پاکستان تون اونا سیالی غلام و آقا نا ءِ۔ اینو شہید آتا قربانی و بلوچ سرمچار تا جہد آن بلوچ راج سرپند مسّنے کہ کوزہ گیر ریاست اسُل کوزہ کروک وطن ئے و اونا بھاتی تہ شون تفک بلکہ شون ئنا دروشینک (اصطلاح) نا وسپہ ئٹ اوفتا زوراکی کننگک۔ ہندن ذہنی، بدنی، سیاسی و معاشی وڑ ئٹ نسخان تننگک۔
ناظر نور پارے کہ دا پھاش ءِ کہ کوزہ گیر نا ادارہ غاک ورنا تہ دروغ ئنا ڈوہ تہ منّفنگ آ بیوس کرسہ اوفتہ بی ایل ایف تون گھنڈرہ و تینا گناہ تہ ڈھکنگ خواہرہ۔ مخلوق ئٹ راجی آجوئی نا جہد ئنا زیات مروکا لس ہمدردی و منّنگ نا بدل ٹی پاکستان نا دا کوشست اونا ادارہ غاتا بےسوبی نا پھاشی ءِ۔ دا وڑ ئنا دا اولیکو تدینی اف۔ بےقانودی ئٹ خلّنگ و بلوچ ورنا تا لٹ کُٹ کننگ سال آتان برجا ءِ۔ بندغی حق آتا داخسا برخلافی تہ حل کننگ ئٹی ادارہ غاتا بےسوبی اوفتا رسوائی ئے گیشتر کیک۔
او پارے کہ کوزہ گیر فوج و ادارہ غاک اختلاف و محکوم نا توار ئے شیف کننگ کن بندغ دشمن و غیر قانودی ئٹ چم آتان کاریم ہلیرہ۔ جہانی مخلوق پاکستان ئٹی بندغی حق آتا برخلافی آ گھام ہفّہ، بلوچستان آن ورنا تا زورئٹ بیگواہی ئے زوت بند کننگہ۔
